खोज

 जितपुर, १९ असोज ।

विजया दशमीको अवसरमा वाणगंगा नगरपालिका–९ मा यस वर्ष पनि परम्परागत सराए नाच भव्य रूपमा सम्पन्न गरिएको छ ।

दसैँको त्रयोदशीको दिन स्थानीय दुर्गा भगवती मन्दिर परिसरमा आयोजित सराए नाचमा स्थानीय युवायुवतीहरूको उल्लेखनीय सहभागिता रह्यो ।

हिन्दु परम्पराअनुसार दसैँको सातौँ दिन (फूलपाती) मा घरघरमा भित्र्याइने देवी दुर्गाको फूलपातीलाई आज बिदाइ गर्दै सराए नाच आयोजना गरिएको हो।

सहभागी युवायुवतीहरूले हातमा खुकुरी, तरबार, खुडा बोकी “डुङडुङ ह… वाख्है…” जस्ता परम्परागत आवाज निकाल्दै, नौमती बाजाको सुमधुर तालमा दुर्गा भगवती मन्दिरको परिक्रमा गरे।

मन्दिर परिसरबाट सुरु गरिएको सराए नाच स्थानीय धिरी नदीको किनारसम्म पुगेको थियो, जहाँ वैदिक विधिअनुसार फूलपातीको विसर्जन गरियो। विसर्जनको क्रममा पुजारीले मन्त्रोच्चारण गर्दै देवी दुर्गालाई धन्यवाद ज्ञापन गरेका थिए ।

कार्यक्रमका साक्षी रहेका स्थानीय समाजसेवी रोमबहादुर खत्रीका अनुसार सराए नाचले समुदायमा धार्मिक, सांस्कृतिक र सामाजिक एकता सुदृढ पार्ने काम गरेको छ। उनले भने, “यो हाम्रो पुरानो संस्कार हो — जसले गाउँका सबै पुस्तालाई एकै ठाउँमा ल्याउने काम गर्छ।”

यस वर्षको सराए नाचमा बालबालिका, युवायुवती र बृद्धबृद्धाको उत्साह समान रूपमा देखिएको थियो । नौमती बाजाको लयमा सबैले रमाइलो गर्दै देवी दुर्गाको जय घोष गरेका थिए । स्थानीय बासिन्दाहरूका अनुसार सराए नाचले दसैँको रौनक अझै बढाएको छ र यसले पुरानो संस्कृतिको संरक्षणमा सहयोग पुर्‍याएको छ ।