खोज

धरान, १६ असोज ।

धरान उपमहानगरपालिकाका मेयर हर्क साम्पाङले गठन प्रक्रियामा रहेको आफ्नै नयाँ राजनीतिक दल ‘श्रम संस्कृति पार्टी’ मा सामाजिक अभियन्ता पुण्य गौतमलाई आबद्ध गराउने इच्छा व्यक्त गरेका छन् ।

साम्पाङले सामाजिक सञ्जालमार्फत गौतमलाई पार्टीमा स्वागत गर्दै लेखेका छन्, “युवा अभियन्ता पुण्य गौतमज्यूलाई श्रम संस्कृति पार्टीमा स्वागत गर्न चाहन्छु ।”

तर यसबारेमा गौतमले कुनै औपचारिक प्रतिक्रिया सार्वजनिक गरिसकेका छैनन् ।

केही दिनअघि मात्रै मेयर साम्पाङले आफ्नै नेतृत्वमा रहेको श्रम संस्कृति पार्टी दर्ताका लागि निर्वाचन आयोगमा निवेदन दिएका छन् । आयोगले दसैं बिदापछि मात्र पार्टी दर्ता प्रक्रिया अगाडि बढाउने बताएको छ ।

स्वतन्त्र उम्मेदवारका रूपमा मेयर पदमा निर्वाचित भएका साम्पाङ धरानमा खानेपानी अभावलाई मुख्य मुद्दा बनाएर निर्वाचित भएका थिए । उनले स्वयंपूर्ण श्रम मार्फत खानेपानी समाधान गर्ने अभियान चलाइरहेका छन् । उनका अनुसार, देश बनाउन श्रमलाई नै मूल आधार बनाउन आवश्यक छ ।

जेन–जी आन्दोलनबाट उत्पन्न जनदबाबले कांग्रेस–एमाले गठबन्धनको सरकार विघटन भई अन्तरिम सरकार गठन भइसकेको छ । साथै, प्रतिनिधि सभा विघटन गर्दै आगामी फागुन २१ गतेका लागि नयाँ निर्वाचनको मिति तोकिएको छ ।

यसै अवसरमा मेयर साम्पाङले पनि पार्टी खोल्न लागेका हुन् ।