खोज

काठमान्डौ, १६ असोज ।

अन्तरिम सरकारकी प्रधानमन्त्री सुशीला कार्कीले जेन-जि युवा आन्दोलनमा ७६ जनाको मृत्यु हुनुका पछाडि सरकारमै रहेका व्यक्तिहरूको अदूरदर्शिता र बुद्धिको कमी मुख्य कारण रहेको बताएकी छन् ।

विजया दशमीको दिन राजधानीमा आयोजित कार्यक्रममा प्रधानमन्त्री कार्कीले आन्दोलनका क्रममा ज्यान गुमाएका शहीद परिवारहरूसँग भेट गरी, घटेको घटनालाई ‘नहुनुपर्ने दुःखद् दुर्घटना’ भन्दै राज्यको गम्भीर भूल स्वीकार गरिन् । प्रधानमन्त्री कार्कीले मृतकहरूका परिवारलाई सरकारले साथ दिने प्रतिबद्धता जनाउँदै भनिन्, “बच्चाहरूको पढाइ, रोजगारी जस्ता विषयमा राज्यले सोचिरहेको छ । शहीदको क्षतिपूर्ति कहिल्यै सम्भव हुँदैन, तर उनीहरूको जीवन पुनःनिर्माणमा साथ दिनु हाम्रो कर्तव्य हो ।”

प्रधानमन्त्रीसँगै सञ्चार तथा सूचना प्रविधिमन्त्री जगदीश खरेल पनि शहीद परिवार भेटघाटमा सहभागी थिए । उनले दशैंमा टीका नलगाएको र शहीद परिवारसँगै समय बिताएको जनाउँदै, “शहीदहरूले बगाएको रगतमाथि अन्याय हुन दिने छैनौं,” भन्दै सरकार न्यायको पक्षमा दृढ रहेको बताए ।

गत भदौ २३ र २४ गते काठमाडौंमा भएको जेन-जि आन्दोलनमा ७६ जनाको ज्यान गएको थियो भने सयौं घाइते भएका थिए । आन्दोलन सुरुवातमा शान्तिपूर्ण रहेको भए पनि, सुरक्षा संयन्त्रको अव्यवस्थित प्रतिक्रिया र भीड नियन्त्रणको असफल प्रयासका कारण स्थिति हिंसात्मक बनेको थियो ।

देश शोकमा डुबेको भन्दै प्रधानमन्त्री सुशीला कार्कीले यस वर्ष टीका नलगाएको र अरुलाई पनि नलगाइदिएको बताएकी छन् । यसैगरी राष्ट्रपति रामचन्द्र पौडेलले पनि यद्यपि आफूले टीका लगाए तापनि, यो वर्ष सार्वजनिक रूपमा टीका नलगाइदिएको राष्ट्रपति कार्यालयले जनाएको छ ।