खोज

काठमान्डौ, १६ असोज ।

जेन–जी आन्दोलनमा संलग्न विभिन्न समूहमार्फत पुराना राजनीतिक दलका तेस्रो पुस्ताका नेताहरुलाई दलभित्रको रूपान्तरणमा सक्रिय भूमिका खेल्न आह्वान गरिएको छ ।

‘राजनैतिक दलका तेश्रो पुस्तालाई आह्वान गर्न चाहन्छौं, देशमा झल्किएको परिवर्तनको हुङ्कारलाई पार्टी भित्र पनि लैजानुस्’ उनीहरुले संयुक्त विज्ञप्तिमा भनेका छन्, ‘असल, इमानदार, नैतिकवान्, दयालु, पारदर्शी, जवाफदेही र जनताप्रति सहानुभूति भएका नेतृत्व, सबै राजनीतिक दलमा अपरिहार्य बनेको छ ।’

उनीहरूले सबै राजनीतिक दलमा इमानदार, नैतिकवान, पारदर्शी, जवाफदेही र जनमुखी नेतृत्वको खाँचो रहेको उल्लेख गर्दै, नेतृत्वको मूल्यांकन तथ्य, ज्ञान र क्षमताका आधारमा हुनुपर्नेमा जोड दिएका छन् । विज्ञप्तिमा भनिएको छ, ‘अब नेताको परिभाषा बदलिनुपर्छ । नेतृत्व पद होइन, जिम्मेवारी हो ।’

विज्ञप्तिमा भनिएको छ कि राजनीतिक विद्रोह मात्रले राज्यसंयन्त्रमा गहिरो जरा गाडिसकेको भ्रष्टाचारको अन्त्य हुन सक्दैन । त्यसका लागि नागरिक समाज र जनताले राज्य संयन्त्रको कामकारवाहीमा सशक्त निगरानी गर्नु आवश्यक भएको उनीहरूको भनाइ छ ।

संघीय लोकतान्त्रिक गणतन्त्र, धर्मनिरपेक्षता, पूर्ण समानुपातिक समावेशीता र अर्थपूर्ण सहभागिताको अवधारणाप्रति प्रतिबद्धता जनाउँदै आन्दोलनकारी समूहले अहिलेको व्यवस्थाप्रति नभई यसका नेतृत्वकर्ताप्रति प्रश्न उठाएको स्पष्ट पारेका छन् ।

विज्ञप्तिमा भनिएको छ, ‘हाम्रो शंका राजनीतिक नेतृत्व, इच्छाशक्ति, दलीय नैतिकता, कार्यप्रणाली र दलतन्त्रप्रति हो । हामी वर्तमान राजनीतिक नेतृत्वलाई खबरदारी गर्न चाहन्छौं ।’

कतिपय नेताहरूले देश लुटेर अकूत सम्पत्ति आर्जन गरेको आरोप लगाउँदै उनीहरूले तेस्रो पुस्तालाई नेतृत्वमाथि खबरदारी गर्न र लुटिएको सम्पत्ति फिर्ता गर्न आग्रह गरेका छन् ।

पूर्वप्रधानमन्त्री केपी शर्मा ओली, गृहमन्त्री रमेश लेखक र काठमाडौँका प्रमुख जिल्ला अधिकारी छवि रिजाल विरुद्ध तत्काल पक्राउ गरी छानबिन प्रक्रिया अघि बढाउन माग गरिएको छ ।

आन्दोलनले वर्तमान सत्ता, नेतृत्व र राजनीतिक दलप्रति जनताको विश्वास गुमिएको स्पष्ट संकेत दिएको विज्ञप्तिमा उल्लेख छ । ‘यो आन्दोलन सरकार र दलप्रतिको गहिरो असन्तोषको चेतावनी हो,’ उनीहरूले भनेका छन्, ‘त्यसैले, आन्दोलनरत पक्ष र राज्यबीच अन्तरिम सरकारलाई वैधानिक रूपमा स्वीकृति दिँदै साझा समझदारीमा पुग्नु आवश्यक छ ।’

यसले जवाफदेही सरकार गठनको मार्गचित्र बनाउने र भविष्यको नेतृत्वलाई स्पष्ट दिशानिर्देश दिने भूमिका खेल्ने विश्वास व्यक्त गरिएको छ ।

विज्ञप्ति इण्डिजिनियस जेन–जी कलेक्टिभ, जेन–जी मुभमेन्ट अलायन्स, हाउ टु देश विकास लगायतका १२ वटा समूहले संयुक्त रूपमा सार्वजनिक गरेका हुन् । उनीहरूले ३९ जिल्लाबाट आएका प्रतिनिधिसँग छलफल गरी संयुक्त अवधारणापत्रसहित विज्ञप्ति जारी गरेका हुन् ।