खोज

काठमान्डौ, १३ असोज ।

जेन–जी आन्दोलनका घटनासम्बन्धी जाँचबुझ आयोगको सिफारिसमा तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक, तत्कालीन गृह सचिव गोकर्णमणि दुवाडी, तत्कालीन राष्ट्रिय अनुसन्धान विभाग प्रमुख हुतराज थापा र काठमाडौंका तत्कालीन प्रमुख जिल्ला अधिकारी छविलाल रिजालको पासपोर्ट रोक्का गरिएको छ । उनीहरू अनुमतिबिना उपत्यका बाहिर जान पनि रोकिएका छन् ।

त्यस्तै, तत्कालीन परराष्ट्रमन्त्री आरजु राणा देउवाका भाइ भूषण राणाको घरमा छापा मारेर कागजात र उपकरण नियन्त्रणमा लिइएको छ । जाँचबुझ आयोगका अध्यक्ष गौरीबहादुर कार्कीका अनुसार तत्कालीन सत्ताधारीबाट अनुसन्धान सुरु गर्न आवश्यक देखिएको कारण यात्रा रोक्का सिफारिस गरिएको हो । आयोगले आवश्यक परेको बेलामा उनीहरूलाई उपस्थित गराउन सरकारले अनुरोध गरिसकेको छ ।

समितिको सदस्यका अनुसार पहिलो चरणमा पाँच जनामाथि निर्णय गरिएको छ भने बिस्तारै अन्य व्यक्तिहरूको हकमा पनि यस्तै कदम चालिनेछ । विशेष अदालतका पूर्वअध्यक्ष कार्कीको संयोजकत्वमा गठन भएको तीन सदस्यीय आयोगमा पूर्वएआईजी विज्ञानराज शर्मा र कानुन व्यवसायी विश्वेश्वरप्रसाद भण्डारी सदस्य रहेका छन् ।

यसैबीच, सम्पत्ति शुद्धीकरण अनुसन्धान विभागले आरजुका भाइ भूषण राणाको जावलाखेलस्थित घरमा छापा मारेको हो । विभागका अनुसार भूषणमाथि सार्वजनिक ठेक्कापट्टा र अन्य आर्थिक सम्बन्धी विस्तृत अनुसन्धान भइरहेको छ ।

जेन–जी विद्रोहको क्रममा २४ भदौमा पूर्वप्रधानमन्त्री देउवा र आरजुको घरमा आगजनी र तोडफोड भएको थियो । घटनास्थलबाट संकलित सबुद प्रमाण प्रयोगशालामा परीक्षणका लागि पठाइएको छ । अनुसन्धानका क्रममा पूर्वप्रधानमन्त्री एवं माओवादी अध्यक्ष पुष्पकमल दाहाल र कांग्रेस नेता दीपक खड्का पनि समावेश छन् ।