खोज

लमही, १२ असोज । 

चाडपर्व नजिकिँदै गर्दा देशभर सडकमा यात्रु चाप बढ्ने गर्छ । तर यसपालि कपिलवस्तुको चन्द्रौटा हुँदै भालुवाङसम्मको यात्रामा देखिएको अवस्था भने अचम्मको छ—सुरक्षा चेकजाँच कतै देखिँदैन । गाडीमा यात्रुको जम्मा सिट भन्दा तीन दोब्बर टिकट दिने गरेको यात्रु बताउँछन् ।

यस मार्गमा यात्रु बाकसिने मात्र नभई ओभर लोड र तीव्र गति समेत खुलेआम भइरहेपनि नियमन गर्ने निकायको उपस्थिति न्यून देखिन्छ । धानखोला र भालुवाङ बिच, करिब १ सय मिटरको दूरीमै काठमाडौँतर्फ जाँदै गरेका दुई वटा यात्रुवाहक बस दुर्घटनामा परे । सौभाग्यवश, ठुलो मानवीय क्षति भएन ।

तर, यसले सडक सुरक्षा र चेकजाँचको प्रश्नलाई पुनः उठाएको छ । सडक सुरक्षा विज्ञहरूका अनुसार, चाडपर्वको बेला यात्रु चाप, सवारी साधनको बढी प्रयोग, चालकको थकान, र ट्राफिक निगरानीको कमीका कारण दुर्घटनाको जोखिम बढ्ने गरेको छ । तर यसपालि यात्रु चाप अत्याधिक भएका कारण पनि दुर्घटनाको दर बढिरहेको छ ।

सामाजिक अभियन्ता हरि रिजाल भन्छन्, “सडकमा चेकजाँच नहुँदा ओभर लोड, तीव्र गति र चालकको लापरबाही रोकिँदैन । त्यो नै दुर्घटनाको प्रमुख कारण हो ।” दैनिक जसो सडकमै ठाउँ ठाउँमा चेकजाँच गर्न खटने प्रहरी पनि चाडपर्वको बेला पातलो मात्रमा देखिन्छन् । यात्रीहरूले पनि चाडपर्वमा सुरक्षित यात्रा गर्न पाउने अधिकार माग गरेका छन् ।

उनीहरू भन्छन्, सवारी चेकजाँच र निगरानीले मात्र दुर्घटना न्यून हुन्छ । चाडपर्वमा यात्रुहरूको सुरक्षाको जिम्मा कसले लिने? भन्ने विषय पेचिलो बनेको छ । राज्यका सम्बन्धित निकाय मौन रहँदा सडकमा यात्रुहरू अझै असुरक्षित महसुस गरिरहेका छन् ।

जिल्ला ट्राफिक कार्यालय दाङले भने आफ्ना मातहतमा रहेका शाशाहरू मार्फत सम्बन्धी स्थानमा खटाएको जनाएको छ ।