खोज

 काठमाडौं, १२ असोज ।

नेपाल राष्ट्र बैंकले गभर्नर प्रा. डा. विश्वनाथ पौडेलका लागि नयाँ घर भाडामा लिन औपचारिक प्रक्रिया सुरु गरेको छ । राष्ट्र बैंकले आइतबार सूचना प्रकाशित गर्दै आवश्यक मापदण्ड पूरा हुने घर भाडामा लिन चाहेको जानकारी दिएको हो ।

गभर्नर पौडेलका चितवन र ललितपुरको भैँसेपाटीस्थित निजी निवासहरू जेनजी आन्दोलनका क्रममा आगजनीमा परेर क्षतिग्रस्त भएका कारण नयाँ घरको खोजी थालिएको हो ।

राष्ट्र बैंकले ललितपुरको बखुन्डोलदेखि भैँसेपाटीसम्मको क्षेत्रभित्र १६ आनादेखि २४ आना क्षेत्रफलको जग्गामा बनेको, कम्तीमा ६ वटा कार वा जिप पार्क गर्न सकिने क्षमता भएको घर भाडामा लिने तयारी गरेको छ ।

आवश्यक मापदण्डअनुसार, आरसीसी स्ट्रक्चरमा निर्माण भएको, कम्तीमा १,००० वर्गफिट प्लिन्थ एरिया भएको घरमा एउटा मास्टर बेडरुम सहित कम्तीमा ४ वटा बेडरुम, लिभिङ हल, किचन, डाइनिङ हल, स्टोर रुम हुनु पर्नेछ । साथै, सुरक्षाकर्मीको बसोबासका लागि छुट्टै भवन पनि अनिवार्य गरिएको छ ।

साथै, प्रस्तावित घर सुरक्षित कम्पाउन्ड वाल भएको, कालोपत्रे सडकसँग जोडिएको, साथै बिजुली, ढल निकास, खानेपानी लगायतका पूर्वाधारयुक्त हुनु पर्ने राष्ट्र बैंकले स्पष्ट पारेको छ । इच्छुक पक्षहरूले २७ असोजभित्र घर भाडा प्रस्ताव पेश गर्न सक्ने व्यवस्था गरिएको छ ।