खोज

काठमाडौँ ।

ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकासमन्त्री कुलमान घिसिङले विद्युतीय चार्जिङ स्टेसनमार्फत युवाहरूलाई रोजगारी सिर्जना गर्न सकिने बताएका छन् ।

विद्युतीय चार्जिङ स्टेसनमा सवारी साधन चार्ज गर्न केही समय लाग्ने भएकाले यात्रुहरूलाई लक्षित गर्दै चार्जिङ स्टेसनको वरपर होटल, रेष्टुरेन्ट, कफी सपजस्ता सेवा व्यवसाय खोल्न सकिने र त्यसबाट रोजगारीको अवसर सिर्जना हुने उल्लेख उनले गरेका छन् ।

चेन्ज डिजिटलले काठमाडौंको सामाखुसीलगायत देशका विभिन्न स्थानमा सञ्चालनमा ल्याएको चार्जिङ स्टेसनको आइतबार उद्घाटन गर्दै मन्त्री घिसिङले प्रदूषण नियन्त्रणका साथै नेपाललाई हरित अर्थतन्त्रतर्फ लैजान इन्धनबाट सञ्चालन हुने सवारी साधनलाई विद्युतीय सवारीमा रूपान्तरण गर्नु आवश्यक रहेको बताए ।

उनले चार्जिङ स्टेसन व्यवसाय लगानीका लागि सम्भावनायुक्त क्षेत्र भएको उल्लेख गर्दै यसबाट मुलुकको अर्थतन्त्रमा सकारात्मक प्रभाव पर्ने धारणा राखे ।

नेपालमा उत्पादन भएको जलविद्युतको खपत बढाउन घरायसी प्रयोग, उद्योग तथा कलकारखानामा यसको प्रयोग विस्तार गर्न सकिने र यसले पेट्रोलियम पदार्थको आयात घटाउन सहयोग पुर्‍याउने उनले बताए ।

उनका अनुसार, आयात घटेसँगै विदेशी मुद्रा सञ्चितिमा सुधार आउने र त्यसले समग्र अर्थतन्त्रमा सकारात्मक योगदान पुर्‍याउनेछ ।

सरकारले विभिन्न नीति तथा योजनाहरू मार्फत विद्युतीय सवारी साधनको प्रयोगलाई प्राथमिकता दिँदै आएको छ । सन् २०३० सम्ममा निजी सवारी साधनको ९० प्रतिशत र सार्वजनिक सवारी साधनको ७० प्रतिशत विद्युतीय बनाउने लक्ष्य रहेको छ । यो लक्ष्यलाई सन् २०३५ सम्ममा क्रमशः ९५ र ९० प्रतिशत पुर्‍याउने लक्ष्य राखिएको छ ।

विद्युतीय सवारी साधनको प्रयोगलाई प्रोत्साहन गर्न नेपाल विद्युत प्राधिकरणले देशभर ६२ वटा चार्जिङ स्टेसन स्थापना गरिसकेको छ भने निजी क्षेत्रबाट करीब ८०० वटा चार्जिङ स्टेसन सञ्चालनमा रहेका छन् ।

वैकल्पिक ऊर्जा प्रवद्र्धन केन्द्रले केन्द्रीय नवीकरणीय ऊर्जा कोष अन्तर्गतको भायबिलिटी ग्याप फन्डिङ सहयोगमा आधारित दिगो ऊर्जा च्यालेञ्ज फन्डमार्फत चार्जिङ स्टेसन स्थापनामा सहयोग गर्दै आएको छ । केन्द्रले १८ वटा कम्पनीसँग ४५ वटा आयोजनामार्फत १२४ स्थानमा चार्जिङ स्टेसन निर्माणमा सहयोग प्रदान गरेको छ ।