खोज

पाल्पा, १२ असोज । 

रिब्दीकोट गाउँपालिका कुसुम खोलाकी कमला खनाल उमेरका हिसाबले ४० वर्ष पुरा गरिन् । शरीर आवश्यक भन्दा तातो हुने, छिटो छिटो रिसाउने जस्ता समस्या भएको उनलाई ४ वर्ष भयो । यो समस्याले श्रीमान् श्रीमती बिचको सम्बन्धमा खटपट पनि भयो ।

अन्ततः बुटवलको एक क्लिनीका मनोचिकित्सकको चेकजाँचमा रजोनिर्वत्ति भएको दम्पतीलाई थाहा भयो । बगनासकाली गाउँपालिकाको चाप पानीकी विमला गैरे पनि ४० वर्षको उमेर पार गरिन् । दुई सन्तानकी आमा बनेकी गैरेलाई मधुमेहले चापेको छ ।

चेकजाँचपछि युनाइटेड मिसन अस्पताल तानसेनका चिकित्सकले उनलाई नियमित रूपमा औषधि सेवन गर्न सुझाएका छन् । नियमित रूपमा घरायसी काम धन्दासँगै दुई वर्ष र ६ वर्षका बच्चाको लालन पालन जिम्मेवारी उनको काँधमा थियो ।

रोगले पारेको परिवर्तनले अन्ततः श्रीमान् सँगको सम्बन्धमा खटपट पैदा भयो । रामपुर नगरका ५२ वर्षीय राजु खनाल उच्च रक्तचाप र मधुमेहले ग्रसित भएका कारण नियमित रूपमा औषधि सेवन गर्ने समूह भित्र पर्छन् ।

उनकी श्रीमती सँग खटपट सुरु भएको सात वर्ष पुरा भयो । श्रीमान् श्रीमती बिच यौन सम्बन्धका कारण खटपट सुरु भएको उनले सुनाए । श्रीमतीको यौन इच्छालाई आफूले उच्च रक्तचाप र मधुमेहका कारण पुरा गर्न नसकेको र आफू अनिच्छुक भएका कारण सम्बन्धमा खटपट भएको उनले बताए ।

पछिल्लो समयमा नसर्ने रोग भित्र पर्ने उच्च रक्तचाप र मधुमेहका कारण परिवारमा समेत विखण्डन सुरु भएको छ । शारीरिक भन्दा मानसिकका कारण यौन दुर्बलताको समस्या बढ्दै गएको छ ।

पूर्व खोला गाउँपालिकाको विरकोटका ५४ वर्षीय खुम बहादुर राना वैदेशिक रोजगार बाट फर्किएका व्यक्ती हुन् । विदेशमा हुँदा मधुमेहले नराम्रो सँग च्याप्यो घर फर्किएका खुम बहादुरले रामपुर अस्पतालका डाक्टरको सल्लाहमा नियमित औषधी सेवन गरे पनि यौन दुर्बलता बढ्दै गयो ।

श्रीमती यौनका कारण अन्यत्र विवाह गर्न बाध्य भएको उनले सुनाए । आफ्नो अनुभव र बुझाइमा दिर्घरोगीहरूमा यौन दुर्बलता देखाउँदो रहेछ । माथागढी गाउँपालिका झडेवाकी ४० वर्षीय कल्पना सारू मधुमेहको नियमित रूपमा औषधि सेवन गर्ने महिला भित्र पर्दछिन् ।

१० वर्षदेखि स्वास्थ्य संस्थाबाट औषधी सेवन गरेकी कल्पनासँग आठ र पाँच वर्षका छोराछोरी छन् । मधुमेहले च्यापेका कारण आफूमा यौन इच्छामा कमी हुँदै गएको श्रीमानको यौन इच्छा पुरा गर्न आफू असक्षम भएको अभियोगमा श्रीमानको काख खोसिएको उनी बताउँछिन् ।

दिर्घरोगका कारण परिवारमा समस्या त सम्बन्ध विच्छेद सम्म पुग्ने गरेको छ । जिल्ला अदालतमा सम्बन्ध विच्छेद हुनुमा दिर्घरोग पनि समस्या भएको अदालतका कर्मचारी बताउँछन् ।

जिल्ला स्वास्थ्य कार्यालयका प्रमुख टुक प्रसाद पोखरेल भन्दछन् पछिल्लो समयमा यहाँ सर्ने भन्दा नसर्ने प्रकृतिको मधुमेह र उच्च रक्तचापको डर लाग्दो समस्या बढिरहेको छ ।

मधुमेहको परिक्षणको क्रममा तानसेन नगरमा ७९।४ प्रतिशत, पूर्व खोलामा ७९.३ प्रतिशत, निस्दी गाउँपालिकामा ७७.९ तिनाउमा ७७.१ , रिब्दीकोटमा ७४.३ रामपुर नगरमा ७३.८ माथागढी गाउँपालिकामा ७१.२ प्रतिशत मधुमेहका रोगी भेटिएको उनले बताए । भयावह रूपमा उच्च रक्तचापको समस्या पनि देखा परेको छ ।