खोज

जितपुर, १२ असोज ।
चाडपर्व आउँदा सरसफाइ गर्ने चलन नयाँ भने होइन । खास गरी नेपालीहरूको महान् चाड विजया दशमी नजिकिँदै आउँदा गाउँलेहरूलाई सरसफाइको चटारो नै हुन्छ । सरसफाइ सँगै बाटोघाटो स्तरोन्नति गर्ने, खाल्डा खुल्डी पुर्ने जस्ता कामहरू पनि हुन्छन् ।

यस क्रममा कपिलवस्तुको बाणगंगा नगरपालिकाभित्रका विभिन्न टोल, वडागत संस्थाहरू र युवा क्लबहरूले गाउँ टोल सरसफाइ अभियानलाई तीव्रता दिएका छन् । नेपालीहरूको महान् चाड विजयादशमी नजिकिँदै गर्दा गाउँघरमा सरसफाइ गर्ने चलन पुरानै भए पनि पछिल्लो समयमा यसले सामुदायिक अभियानकै रूप लिएको छ ।

दसैँमा घर–आँगन मात्र नभई बाटो, घाँटो, सार्वजनिक स्थल, मन्दिर र बजार क्षेत्र समेत चकाचक बनाउन गाउँलेहरू जुटेका छन् । यसै क्रममा बाणगंगा नगरपालिका वडा नं. ८ अन्तर्गत पुलचोक टोल विकास संस्थाले गाउँ टोल सरसफाइ अभियान सञ्चालन गरेको छ ।

संस्थाले सरसफाइसहित बाटो, नाली सफा गर्ने, खाल्डाखुल्डी पुर्ने काम गरेर गाउँलाई आकर्षक बनाएको छ । स्थानीयवासीको अनुसार यस अभियानपछि टोल पुरै चिरिच्याट देखिएको छ । त्यस्तै, बाणगंगा वडा नं. ७ को मोतिपुर प्रगतिशील युवा क्लबले मोतिपुर बजार टोल र गनसहवा टोलमा सरसफाइ अभियान सञ्चालन गरेको छ ।

क्लबका अध्यक्ष शङ्कर न्यौपानेका अनुसार क्लबले एक सातासम्म निरन्तर सरसफाइ अभियान सञ्चालन गर्ने निर्णय गरेको हो । अभियानमा स्थानीय बासिन्दाको उल्लेखनीय सहभागिता देखिएको छ ।

यस्तै, बाणगंगा वडा नं. १ अन्तर्गत दुर्गा मन्दिर व्यवस्थापन समिति तथा बैरीया युवा समाजले संयुक्त रूपमा मन्दिर वरपर र आसपासको क्षेत्र सफा गरेका छन् । मन्दिर वरपरको सरसफाइले चाडपर्वमा आउने भक्तजनलाई सहज हुने अपेक्षा गरिएको छ ।

यसै गरी, वडा नं. २ मा वडा अध्यक्ष विष्णु प्रसाद पौडेलको पहलमा विभिन्न वन उपभोक्ता समूहका अध्यक्ष र स्थानीयको सक्रियतामा सरसफाइ सम्पन्न गरिएको छ । वडा अध्यक्ष पौडेलले सरसफाइ अभियान निरन्तरता दिन सबैलाई आग्रह गरेका छन् ।

स्थानीय बासीका अनुसार चाडपर्वमा सफा वातावरणले खुसी र उत्साह थप गर्छ भने स्वास्थ्यसमेत जोगिन्छ । सरसफाइ अभियानले गाउँमा एकता र सहकार्यको भावना बढाएको छ । चाडपर्वलाई स्वागत गर्न गरिएको यो अभियानले वातावरण संरक्षण र सामाजिक सद्भाव दुवैलाई सुदृढ बनाएको सरोकारवालाहरूको भनाइ छ ।