खोज

पाल्पा, १० असोज ।

पाल्पाको तानसेनमा विपत् तथा महामारीको समयमा यौन तथा प्रजनन स्वास्थ्य सुरक्षामा पर्ने जोखिमसम्बन्धी अभिमुखीकरण कार्यक्रम सम्पन्न भएको छ ।

शुक्रबार नेपाल परिवार नियोजन संघ, पाल्पाको आयोजनामा भएको उक्त कार्यक्रममा विपद् र महामारीका बेला यौन तथा प्रजनन स्वास्थ्यमा पर्न सक्ने जोखिम र तिनको न्यूनिकरणका उपायबारे सरोकारवालाबीच प्रस्तुतीकरण गरिएको थियो ।

संघका शाखा प्रबन्धक शोभाकान्त न्यौपानेले नेपाल परिवार नियोजन संघले केवल परिवार नियोजनका साधन वितरणमा मात्र सीमित नरही, विपद्का समयमा मानविय सेवा पनि प्रदान गर्दै आएको जानकारी दिए। उनले परिवार नियोजन भनेको केवल सन्तान संख्या नियन्त्रण नभई सम्पूर्ण परिवार व्यवस्थापनसँग सम्बन्धित भएको उल्लेख गरे ।

न्यौपानेका अनुसार, विपत्को अवस्थामा विद्युतीय सञ्चार माध्यमले काम नगरेको खण्डमा सूचना पाटी (सूचना बोर्ड) मार्फत यौन तथा प्रजनन स्वास्थ्यसम्बन्धी जानकारी प्रवाह गर्न सकिने व्यवस्था गरिएको छ ।

विपत्को समयमा हुन सक्ने जवरजस्ती करणी, गर्भवती तथा सुत्केरी महिलाले भोग्न सक्ने समस्या लगायतका विषयलाई संघले प्राथमिकतामा राखेर कार्यक्रम सञ्चालन गर्दै आएको समेत उनले स्पष्ट पारे ।

उनले जिल्लाको विपद् व्यवस्थापन समितिमा परिवार नियोजन संघका प्रतिनिधिहरू पनि सक्रिय रूपमा सहभागी हुने जानकारी दिँदै विपत्का लागि आवश्यक ‘मर्यादा सामग्री’को ६ सेट तयारी अवस्थामा राखिएको बताए ।

कार्यक्रममा महामारी तथा विपद्को अवस्थामा जिल्ला स्तरका सरकारी निकाय, सुरक्षा निकाय, स्वास्थ्य संस्था, सञ्चारकर्मी लगायत सम्बन्धित संघसंस्थाले निर्वाह गर्नुपर्ने भूमिकाबारे सचेतनामूलक प्रस्तुती तथा अभ्यास समेत गरिएको थियो।

वि.सं. २०१६ सालमा स्थापना भएको नेपाल परिवार नियोजन संघले ग्रामीण भेगमा स्वास्थ्य चौकी नहुँदा देखिनै समुदायमा पुगेर सेवा प्रदान गर्दै आएको छ।