खोज

काठमाडौँ ।

भारत सरकार शासित प्रदेश लद्दाखलाई पूर्ण राज्यको दर्जा दिन माग गर्दै लेह सहरमा बुधबार भएको हिंसात्मक प्रदर्शनमा ४ जनाको मृत्यु भएको छ भने ७० जनाभन्दा बढी घाइते भएका छन् ।

भारतीय सञ्चारमाध्यमका अनुसार प्रदर्शनकारीले लेहमा रहेको भारतीय जनता पार्टी (भाजपा) को कार्यालयमा आगजनी गरेका छन् ।

प्रदर्शनकारी युवाहरूले ढुंगा प्रहार गरेपछि उनीहरू र सुरक्षाकर्मीहरूबीच झडप भएको थियो । प्रदर्शनको नेतृत्व लद्दाखलाई पूर्ण राज्यको मान्यता दिनुपर्ने र भारतीय संविधानको छैटौँ अनुसूचीमा समावेश गर्नुपर्ने माग गर्दै वातावरणीय अभियन्ता सोनम वाङचुकले गरेका थिए ।

भारतको गृह मन्त्रालयले एक विज्ञप्ति जारी गर्दै सोनम वाङचुकमाथि नेपालमा हालै भएको जेन-जेड आन्दोलनको उदाहरण दिएर भिडलाई उक्साएको आरोप लगाएको छ । मन्त्रालयले केन्द्र सरकारले वार्ताका लागि ढोका खुला राखेको र प्रक्रिया जारी रहेको पनि जनाएको छ ।

बुधबारको घटनामा प्रदर्शनकारीले भाजपा कार्यालयसहित सीईसी कार्यालय र प्रहरीका सवारीसाधनमा समेत आगो लगाएका छन् । सुरक्षाकर्मीहरूमाथि आक्रमण भएपछि स्थिति नियन्त्रणमा लिन प्रहरीले आत्मरक्षाका लागि गोली चलाएको बताइएको छ । यही क्रममा चार जनाको मृत्यु भएको हो भने झडपमा परी ३० भन्दा बढी सुरक्षाकर्मी घाइते भएका छन् ।

स्थिति अत्यन्तै संवेदनशील बनेपछि लद्दाखका उपराज्यपाल कविन्दर गुप्ताले लेह जिल्लाभर कर्फ्यु आदेश जारी गरेका छन् ।