खोज

काठमाडौं, ९ असोज ।

नेकपा माओवादी केन्द्रको केन्द्रीय समितिमा अध्यक्ष पुष्पकमल दाहाल ‘प्रचण्ड’ले पेश गरेको विशेष महाधिवेशनको प्रस्तावमा वरिष्ठ उपाध्यक्ष नारायणकाजी श्रेष्ठ र उपमहासचिव जनार्दन शर्माले असहमति जनाएका छन् ।

अध्यक्ष प्रचण्डले आगामी मंसिरमा विशेष महाधिवेशन गरी पदाधिकारी र केन्द्रीय समिति भंग गर्ने प्रस्ताव प्रस्तुत गरेका थिए । तर, उपमहासचिव शर्माले उक्त प्रस्ताव अस्वीकृत गर्दै नयाँ प्रस्ताव राखेका छन् । उनले भनेका छन्, “सबै पदाधिकारीले राजीनामा दिएर निर्देशक समितिमा बसेर नयाँ पुस्तामा नेतृत्व हस्तान्तरण गरौं ।”

यस अघि वरिष्ठ उपाध्यक्ष श्रेष्ठले पनि प्रचण्डको प्रस्ताव अनुसार मंसिरमा विशेष महाधिवेशन सम्भव नभएको बताउँदै भनेका थिए, “मंसिरमा विशेष महाधिवेशन सम्भव छैन, निर्वाचनपछि मात्र महाधिवेशन गर्नुपर्छ ।”

भदौ २३ र २४ गते भएको जेनजी आन्दोलनपछि तत्कालीन प्रधानमन्त्री केपी शर्मा ओलीले राजीनामा दिएका थिए । त्यसपछि प्रतिनिधि सभाबाट अर्को सरकार बन्न नसक्ने अवस्था आएपछि पूर्व प्रधानन्यायाधीश सुशीला कार्कीको नेतृत्वमा अन्तरिम सरकार बनेको हो ।

अन्तरिम सरकारको सिफारिसमा राष्ट्रपति रामचन्द्र पौडेलले प्रतिनिधि सभा विघटन गरी आगामी फागुन २१ गते चुनावको मिति तोकेका छन् । वरिष्ठ उपाध्यक्ष श्रेष्ठको भनाइ अनुसार, उक्त चुनाव समयमै सम्पन्न गराउन पार्टीले भूमिका खेल्नुपर्ने भएकाले महाधिवेशन चुनावपछि गर्नुपर्ने प्रस्ताव गरेका हुन् ।

 तर, अध्यक्ष प्रचण्ड भने अहिले नै राजीनामा दिनुपर्ने बताउँछन् । बदलिएको परिस्थितिमा प्रचण्डले नेतृत्व छाड्नुपर्ने उनको आग्रह छ । वरिष्ठ उपाध्यक्ष श्रेष्ठले राखेको भनाइ उद्धृत गर्दै एक नेताले भने,

“अध्यक्ष कमरेड प्रचण्डले अहिले नै अध्यक्ष छोडेर मलाई कार्यवाहक अध्यक्ष दिनुस् । यो मेरो कुरा होइन, आम कार्यकर्ता र यो हलको भावना हो ।” यसअघि आइतबार बसेको माओवादी पदाधिकारी बैठकमा पनि वरिष्ठ उपाध्यक्ष श्रेष्ठले कार्यवाहक अध्यक्ष माग गरेका थिए । उपमहासचिव शर्माले भनेका छन्,

“नारायणकाजीले पनि मलाई कार्यवाहक दिनुपर्छ भनेर माग गर्नुभएको थियो । मैले भनेँ, दुई महिना त हो, केही बिग्रँदैन, दिनुहोस् ।” महाधिवेशनसम्म वरिष्ठ उपाध्यक्ष श्रेष्ठले कार्यवाहक अध्यक्षको रूपमा नेतृत्व गर्ने र त्यसपछि प्रचण्ड सहितका सबै पदाधिकारीले नेतृत्व नलिनुपर्ने उपमहासचिव शर्माको सार्वजनिक प्रस्ताव छ ।

साथै, अहिलेका सबै पदाधिकारी निर्देशक समितिमा रूपान्तरण हुनुपर्ने उनको माग छ । मंसिरमा हुने महाधिवेशनबाट पूरै नयाँ नेतृत्व ल्याउने उनको प्रस्ताव छ । यसले पार्टीको साख थप बढ्ने उनको विश्वास छ ।

उपमहासचिव शर्माले भनेका छन्, “पार्टीले केवल महाधिवेशन तोकेर मात्रै पुग्दैन, महाधिवेशनमा कार्यकर्ताले स्वतन्त्र रूपमा नेता छान्न पाउनुपर्छ र नयाँ विचार प्रस्तुत गर्ने वातावरण बनाउनुपर्छ।”

केन्द्रीय समितिको बैठकमै वरिष्ठ उपाध्यक्ष श्रेष्ठले कार्यवाहक अध्यक्ष माग गरेका थिए र त्यसपछि बोलेका उपमहासचिव शर्माले पनि प्रचण्डको प्रस्तावमा असहमति जनाएका हुन् ।