खोज

काठमाडौँ ।

नारायणघाट–मुग्लिन सडक खण्डमा वर्षेनि पहिरो खस्ने समस्या नरोकिएपछि त्यसको दीर्घकालीन विकल्प खोज्ने विषयमा सरकार गम्भीर भएको छ ।

भौतिक पूर्वाधार तथा यातायातमन्त्री कुलमान घिसिङले तनहुँ र नवलपरासीको क्षेत्र हुँदै नयाँ वैकल्पिक मार्गबारे सरकारी तहमा छलफल सुरु भएको जानकारी दिएका छन् ।

बिहीबार पत्रकार सम्मेलनमा मन्त्री घिसिङले पहिरोको जोखिम न्यूनीकरण र यात्रु सुरक्षाका लागि नयाँ विकल्पको खाँचो रहेको बताए । उनका अनुसार सो क्षेत्र हुँदै जाने वैकल्पिक मार्गको ट्र्याक पहिल्यै खनिएको भए पनि पुल निर्माणको ढिलाइका कारण हालसम्म प्रयोगमा ल्याउन सकिएको छैन ।

ती पुलहरू निर्माणमा गति दिनुपर्ने आवश्यकता रहेको उनले बताए । उनले भने, “फास्ट ट्रयाक बनेपछि एउटा ठूलो विकल्प खुल्ने छ । तर नारायणघाट–मुग्लिन सडकलाई दुई लेनमा मात्रै विस्तार गर्नुको सट्टा त्यसको विकल्पका रूपमा पारिपट्टिको मार्ग प्रयोग गर्न सकिने सम्भावनाबारे पनि छलफल भइरहेको छ ।”

हालको नारायणघाट–मुग्लिन सडकखण्ड चितवन जिल्लाको भरतपुर हुँदै नारायणघाटसँग जोडिन्छ । वैकल्पिक रूपमा प्रस्ताव गरिएको मार्ग तनहुँ जिल्लाबाट निस्किएर कालीगण्डकी र सेती नदी पार गरी नवलपरासी पश्चिमतर्फ जान्छ । यो मार्ग देवघाट हुँदै गैँडाकोटसँग जोडिन सक्ने अनुमान गरिएको छ ।