खोज

बुटवल, ०९ असोज । 

सरकारी जग्गा अवैध बाटो बाट व्यक्तिको नाममा पुगेको ३६ वर्षपछि पुनः सरकारकै नाममा आएको छ । ३ दशक भन्दा बढि समय व्यक्तिको नाममा स्रेस्ता कायम गरेर राखेको जग्गा मालपोत कार्यालय बुटवलले पुनः सरकारकै नाममा फिर्ता ल्याउन सफल भएको हो ।

रुपन्देहीको तिलोत्तमा नगरपालिका (साबिक मक्रहर १) मा रहेको एक बिगाहा एक धुर जग्गा ३६ वर्ष पहिला एक व्यक्तिले आफ्नो नाममा दर्ता गरेका थिए ।

लमजुङ जिल्ला स्थायी ठेगानामा भएका यज्ञ निधी शर्माको नाममा स्रेस्ता कायम गरी जग्गा व्यक्तिको नाममा दर्ता भएको थियो । तत्कालीन जिल्ला मालपोत कार्यालयमा दर्ता भएको यो जग्गा जनहित मावि सार्वजनिक जग्गा रहेको र विद्यालयको नाममा पाउनुपर्ने भन्दै मालपोत कार्यालयमा सोधखोज गर्न गएपछि यसको रहस्य खुलेको थियो ।

उक्त जग्गाको मूल्य करिब दुई करोड मूल्य बराबर भएको स्थानीय बताउँछन् ।  तत्कालीन अवस्थामा कार्यालय बुटवलले सरकारी जग्गा कसरी व्यक्तिको नाममा स्रेस्ता कायम भयो भन्ने विषयमा लामो अनुसन्धानपछि २०८२ असोज ६ गते मालपोत कार्यालय बुटवलमा बसेको बैठकले उक्त जग्गाको स्रेस्ता बदर गर्ने निर्णय गर्दै नेपाल सरकारको नाममा जग्गा फिर्ता ल्याउन सफल भएको मालपोत कार्यालय, बुटवलले जनाएको छ ।

मालपोत कार्यालय, बुटवलका मालपोत अधिकृत हरि पन्थका अनुसार सरकारी जग्गा खोजतलास गर्ने क्रममा साबिक मक्रहर १ ख को कित्ता नम्बर १ सय १६ क्षेत्रफल ज बि १, ०, १ को जग्गा स्रेस्ता बदर गरी मालपोत कार्यालय बुटवलको मिसिल नम्बर १२० ले उक्त जग्गा सरकारका नाममा फिर्ता गरेको हो ।

मालपोत कार्यालय बुटवलले तत्कालीन समयमा सरकारी जग्गा व्यक्तिको नाममा गराएर सरकारी जग्गा हिनामिना गर्ने मानिसहरूको पहिचान गरी कडा भन्दा कडा कारबाही गर्न जिल्ला प्रशासन कार्यालय रुपन्देही, जिल्ला प्रहरी कार्यालय रुपन्देही र अख्तियार दुरुपयोग अनुसन्धान आयोगको कार्यालय बुटवललाई पत्र समेत पठाएको जानकारी गराएको मालपोत कार्यालय बुटवलले जनाएको छ ।

नक्कली लालपुर्जा बनाएको आरोपमा मालपोत कार्यालय बुटवल र भैरहवा मालपोतका कर्मचारी पक्राउ परेका थिए । नक्कली लालपुर्जा बनाउने केही कर्मचारी कारबाहीका लागि जेल चलान भएका छन् । रुपन्देहीमा अवैध कारोबार गर्ने जग्गा माफिया विरुद्ध प्रशासनले छानबिन तथा कारबाही सुरु गरेको स्रोतको भनाइ छ ।