खोज

 काठमाडौं, ८ असोज ।

राष्ट्रपति रामचन्द्र पौडेलले मतदाता नामावली ऐन २०७३ लाई संशोधन गर्न बनेको अध्यादेश जारी गरेपछि मतदाता नामावली संकलनको बाटो खुलेको छ । अब मतदाता नामावलीमा नाम छुटेकाहरूले आफ्नो नाम दर्ता गराउन सक्नेछन् । तर त्यसअघि निर्वाचन आयोगले त्यस सम्बन्धी निर्णय गरेर मतदाता नामावली संकलनको मिति तोक्नेछ ।

निर्वाचन आयोगका सूचना अधिकारी सुमन घिमिरेले भने, ‘अध्यादेश जारी भएपछि कानुन बमोजिम मतदान गर्न योग्यता पुगेकाहरूको नामावली संकलनका लागि बाटो खुलेको छ । त्यसका लागि निर्वाचन आयोगले आवश्यक निर्णय गर्ने छ ।’

जेनजी युवा आन्दोलनपछि गठन भएको अन्तरिम सरकारले ताजा जनादेशका लागि आगामी फागुन २१ गते निर्वाचन गर्ने निर्णय गरिसकेको छ । निर्वाचन मिति घोषणा भइसकेको अवस्थामा मतदाता नामावलीमा नयाँ नाम थप्न पाइँदैन भन्ने कानुनी व्यवस्था थियो ।

तर राजनीतिक परिवर्तनमा सक्रिय भूमिका निर्वाह गरेका थुप्रै युवाहरूको उमेर पुगे पनि उनीहरूको नाम मतदाता नामावलीमा नदर्ता भएकोले, त्यस्ता नागरिकहरूलाई मतदानको अवसर सुनिश्चित गर्न कानुनी गाँठो फुकाउने उद्देश्यले अध्यादेश ल्याइएको हो ।

मतदाता नामावली ऐन २०७३ को दफा ४ को उपदफा २ को खण्ड (२) मा भएको व्यवस्था संशोधन गर्न यो अध्यादेश ल्याइएको हो । उक्त दफामा ‘निर्वाचनको मिति घोषणा भइसकेपछि सो निर्वाचनको प्रयोजनका लागि मतदाता नामावलीमा नाम दर्ता गरिने छैन’ भन्ने प्रावधान थियो ।

यही व्यवस्थाका कारण मतदाता नामावली संकलनको प्रक्रिया रोकिएको थियो । सो बाधा हटाउन अध्यादेश ल्याइएको निर्वाचन आयोगले जनाएको छ ।