खोज

काठमाडौं ।

अर्थमन्त्री रामेश्वर खनाल र अर्थ मन्त्रालयको गुनासो मेलबक्समा सार्वजनिक सूचना जारी गरिएको ६ घण्टाको अवधिमा १ सय ६६ वटा गुनासोयुक्त इमेल प्राप्त भएका छन् । अर्थ मन्त्रालयसँग सम्बन्धित कुनै गुनासो भएमा वा कर्मचारीले घुस मागेमा सिधै इमेल गर्न सकिने सूचना जारी गरिएको थियो ।

सूचना सार्वजनिक भएको छोटो समयमा प्राप्त ती गुनासोमध्ये तीन वटा गुनासो तत्काल समाधान गरिएको अर्थमन्त्री खनालले जानकारी दिएका छन् ।

उनका अनुसार प्राप्त गुनासोमध्ये करिब दुई दर्जन इमेलको उनले व्यक्तिगत रूपमा जवाफ दिएका छन् । तीमध्ये थुप्रै गुनासोमा आवश्यक कारबाहीसमेत गरिसकिएको जानकारी उनले सामाजिक सञ्जालमार्फत दिएका छन् । उनले स्पष्ट पारेका छन् कि इमेलमार्फत आएका गुनासोहरूमध्ये केहीमा तत्काल प्रतिक्रिया दिँदै आवश्यक कदम चालिएको छ ।

अर्थमन्त्री खनालले पहिलो रूपमा समाधान गरिएको गुनासो कोशी प्रदेशको म्याङलुङ नगरपालिका सम्बन्धी रहेको बताए । स्थानीय तह सञ्चित कोष व्यवस्थापन प्रणालीमा देखिएको प्राविधिक समस्याका कारण त्यहाँका कर्मचारीहरूले तलब पाएका थिएनन् ।

उक्त समस्या समाधान गरिएको छ । दोस्रो गुनासो तार्केश्वर नगरपालिका सम्बन्धी रहेको थियो, जहाँ प्रमुख प्रशासकीय अधिकृतले काम नगरेर सेवाग्राहीलाई सास्ती दिएको गुनासो आएको थियो । गुनासो साँचो ठहरिएपछि सम्बन्धित प्रशासकीय अधिकृतको सरुवा गरिएको हो ।

तेस्रो गुनासो कर फिर्ता प्रक्रियामा २ प्रतिशत कमिसन दिनुपर्ने अवस्था सम्बन्धी थियो । उक्त गुनासोप्रति प्रतिक्रिया दिँदै अर्थमन्त्री खनालले ‘यो विषय अख्तियारमा जानुपर्ने हो’ भन्दै गुनासोकर्तालाई सचेत गराएका थिए । उनका अनुसार, त्यसपछिको छानबिनबाट सो समस्या समाधान भएको छ ।

अर्थमन्त्री खनालले मेलमार्फत प्राप्त बाँकी गुनासोहरूको पनि यथाशीघ्र समाधान गरिने बताए । साथै, इमेल प्रणालीमार्फत गुनासो समाधानको यो प्रक्रिया प्रभावकारी बनेमा अब आफ्ना समस्या समाधानका लागि सर्वसाधारणलाई सिंहदरबारसम्म धाउनुपर्ने बाध्यता हट्ने उनले उल्लेख गरेका छन् ।