खोज

पाल्पा, असोज ७ ।

पाल्पाको तिनाउ गाउँपालिका–सत्यवती क्षेत्रमा मौसमी तथा बेमौसमी तरकारी खेती गर्ने किसान र व्यवसायी अहिले ठूलो समस्यामा परेका छन् । वर्षात्पछि सडक मर्मत नहुँदा स्थानिय उत्पादन बजारसम्म पु¥याउन उनीहरू मानव श्रममै निर्भर बन्न बाध्य भएका छन् ।

सत्यवतीका स्थानीय विरे बहादुर गाहाका अनुसार, गाउँमा मोटर बाटो पुगेपछि सुरुमा सबै खुसी भए पनि वर्षायाम लागेपछि समस्या सुरु हुन्छ । “हिउँदमा त सजिलो हुन्छ, तर वर्षातमा सडक बिग्रँदा तरकारी उत्पादनकै बेला बजार पु¥याउन सक्दैनौं,” उनले भने ।

स्थानीयको मुख्य आम्दानी कृषि र वनजंगलजन्य उत्पादन हो । तरकारी, केरा, तेजपत्ता र दालचिनी वर्षैभरि यहाँबाट बाहिरिने गर्छ । तर सडक अवरुद्ध हुँदा ढुवानी गर्न कठिन हुने भएकाले किसानलाई समस्या भएको स्थानीय मालती दर्लामी बताउँछिन् ।

झुम्सा–चौबिस माइल हुँदै जोडिएको सडक खण्ड सत्यवती, बौरीडाडा, माथिल्लो सत्यवती हुँदै माथागढी गाउँपालिकाको गोठादीसम्म पुग्छ । तर यो सडक खण्डमा महिनौँदेखि पहिरोका कारण यातायात बन्द छ । “मर्मत गर्ने संकेत नै छैन, किसानले आफ्नै भारी बोकेर उत्पादन बजार पु¥याउनुपरेको छ,” उनले दुखेसो पोखेकी छन् ।

चुरे क्षेत्रभित्र पर्ने सत्यवती भूगोलका हिसाबले अति संवेदनशील मानिन्छ । यहाँ ठूला डोजर प्रयोग गरी सडक बनाइएकाले सामान्य वर्षातमै पहिरोको जोखिम बढेको प्राविधिकहरूले बताएका छन् । स्थानीय लालबहादुर दर्लामी भन्छन्, “मानव श्रमको सट्टा डोजरले बाटो खनिँदा अब माटो बग्ने समस्या सामान्य भइसकेको छ ।”

तिनाउ गाउँपालिकाका प्रेम श्रेष्ठले भने अब चाँडै सडक मर्मत गर्ने योजना रहेको जानकारी दिए । “वर्षा रोकिएको छ, अब २–४ दिनभित्र सबै वडाका सडक मर्मत हुन्छन्,” उनले बताए ।

स्थानीय सन्तोष ढाडाका अनुसार, गाउँमा जंगल प्रशस्त छ र मनसुनमा अन्य क्षेत्रभन्दा बढी वर्षा हुने भएकाले क्षति बढ्ने गरेको छ । “पहिला बाटो बनाउन हतार गरियो, अहिले त्यही कारणले पहिरोले सडक नै बन्द भएको छ,” उनले भने ।

सडक अबरुद्ध हुँदा किसानले बजारसम्म उत्पादन पुर्‍याउन नपाउँदा आर्थिक नोक्सानी व्यहोर्नु परेको छ । तत्काल मर्मत नभएसम्म सत्यवतीका व्यवसायी र किसानलाई मानव श्रममै भर पर्नुपर्ने बाध्यता कायम छ ।