खोज

काठमाडौँ ।

नेपाली राष्ट्रिय महिला फुटबल टिमले भारतसहित तीन देशसँग मैत्रीपूर्ण खेल खेल्ने भएको छ । अखिल नेपाल फुटबल संघ (एन्फा) ले अक्टोबर र नोभेम्बर महिनामा यी खेलहरू तय भएको जानकारी दिएको हो ।

नेपालले भारतसँग अक्टोबर २६ मा सिक्किममा अन्तर्राष्ट्रिय मैत्रीपूर्ण खेल खेल्नेछ । त्यसपछि अर्को महिनामा तीन देश सम्मिलित मैत्रीपूर्ण श्रृंखला हुने भएको छ ।

इन्डोनेसियामा नोभेम्बर २६ देखि डिसेम्बर २ सम्म हुने उक्त श्रृंखलामा नेपालले नोभेम्बर २६ मा इन्डोनेसियासँग र डिसेम्बर २ मा चाइनिज ताइपेइसँग खेल्नेछ । इन्डोनेसिया र चाइनिज ताइपेइबीचको खेल नोभेम्बर २९ मा हुनेछ ।

गत असारमा एन्फाका पदाधिकारीसँग प्रशिक्षकबीच विवाद भएपछि प्रशिक्षक प्याट्रिक डे वाइल्डले राजीनामा दिएका थिए । सोही समयमा कप्तानको विषयलाई लिएर पनि विवाद भएको थियो ।

वाइल्डले सावित्रा भण्डारी ‘साम्बा’ लाई कप्तान नियुक्त गर्दै त्यसअघिकी कप्तान एन्जिला तुम्वापो सुब्बालाई बेन्चमा सीमित गरेका थिए । तर एन्फाका केही सदस्य तथा कर्मचारीहरूले साम्बालाई कप्तान दिन नहुने भन्दै असहमति जनाउँदै प्रशिक्षकलाई हटाउने चेतावनी दिएका थिए ।

नेपाली महिला टिममा पहिलो पटक प्रो लाइसेन्स प्राप्त प्रशिक्षक नियुक्त गरिएको भए पनि पहिलो भ्रमणमै प्रशिक्षकलाई राजीनामा दिन एन्फाले बाध्य पारेको थियो ।

एएफसी एसियन कप छनोटका लागि उज्बेकिस्तान पुगेको टोलीले त्यहीँ विवाद चर्किएपछि नेपाल फर्किएको थियो । तर प्रशिक्षक वाइल्ड भने सोही स्थानबाट स्वदेश नफर्की इमेलमार्फतै राजीनामा दिएका थिए ।

एन्फाले उज्बेकिस्तानमा भएको विवादका विषयमा स्पष्टीकरण मागेपछि उनले इमेलबाटै घटनाको विवरण उल्लेख गर्दै राजीनामा पठाएका थिए ।

त्यसपछिका घटनाहरूमा एन्फाले साम्बामाथि पक्षपाती व्यवहार गरेको देखिएको थियो । साम्बा न्यूजिल्यान्डको क्लबमार्फत अष्ट्रेलियामा लिग खेल्न गएकी थिइन् । सुरुवातमा एन्फाले उनलाई शुभकामना दिएको भए पनि पछि त्यो पोस्ट हटाइएको थियो ।

यसबारे सामाजिक सञ्जालमा व्यापक आलोचना भएपछि एन्फाले आफ्नो फेसबुक पेजमा कमेन्ट गर्न नमिल्ने बनाएको थियो । तर ‘जेनजी’ आन्दोलनपछि पुनः कमेन्ट गर्न मिल्ने बनाइएको छ । अहिले एन्फाले साम्बाका तस्वीरहरू पनि सार्वजनिक गर्न थालेको छ ।