खोज

 काठमाडौँ, ७ असोज ।

ऊर्जा, जलस्रोत तथा सिँचाइसम्बन्धी तीन मन्त्रालयको जिम्मेवारी पाएका कुलमान घिसिङ र नेपालस्थित बेलायती राजदूत रव फेनबिच सिंहदरबारस्थित ऊर्जा, जलस्रोत तथा सिँचाइ मन्त्रालयमा भेटवार्ता भएको छ ।

भेटमा नवनियुक्त मन्त्री घिसिङलाई बेलायती राजदूत फेनले बधाई दिएर सफल कार्यकालको शुभकामना व्यक्त गरे ।

दुवै पक्षबिच नेपाल बेलायतबिचको मित्रता, सहकार्य, ऊर्जा क्षेत्रमा बेलायतको सहयोग, पूर्वाधार क्षेत्रमा लगानीको सम्भावना तथा जलवायु परिवर्तनबाट उत्पन्न समस्याहरू न्यूनीकरणका उपायहरूमा आवश्यक सहयोग लगायतका विषयमा छलफल भएको थियो ।

मन्त्री घिसिङले जेनजी आन्दोलनपछि गठन भएको सरकारले मुख्य प्राथमिकताका रूपमा आन्दोलनका कारण क्षति पुगेका संरचनाको पुनर्निर्माण, आगामी आम चुनाव तथा सुशासन कायम गर्न केन्द्रित रहेको बताए ।

नेपालको पुरानो मित्र बेलायतले नेपालको आर्थिक विकासमा गरेको सहयोगको प्रशंसा गर्दै उनले नेपाललाई कार्बनमुक्त बनाउन विद्युतीय सवारी साधनको प्रयोग बढाउन चार्जसङ स्टेसन स्थापना गर्न भइरहेको सहयोग प्रभावकारी रहेको बताए ।

बेलायतमा पूर्वाधार निर्माणमा सफल मानिएको सार्वजनिक निजी साझेदारी लगानी मोडेललाई नेपालमा पनि लागू गर्न, ग्रिन हाइड्रोजन तथा जलवायु परिवर्तनले उत्पन्न हिमताल विस्फोट जोखिम अध्ययन लगायत क्षेत्रमा सहयोग गर्न आग्रह समेत गरेका थिए ।

राजदूत फेनले बेलायत नेपालको पुरानो मित्रता उल्लेख गर्दै नेपालको सफलतालाई आफ्नो देशको सफलता ठानेको र नेपालको आर्थिक रूपान्तरणमा सहयोग गर्ने प्रतिबद्धता व्यक्त गरेका थिए ।