खोज

सल्यान, ०६ असोज ।

जिल्ला प्रशासन कार्यालय सल्यानले पालिका स्तरमै पुगेर राष्ट्रिय परिचयपत्र वितरण सुरु गरेको छ। कुमाख गाउँपालिकाबाट आइतबार सुरु भएको परिचयपत्र वितरण कार्यक्रम एक साता सम्म चल्नेछ ।

जिल्ला प्रशासन कार्यालयका कम्प्युटर अपरेटर अर्जुन रावतका अनुसार कार्यक्रमअन्तर्गत पालिकाभित्र रहेका अपाङ्गता, अशक्त तथा ज्येष्ठ नागरिकहरूका लागि पनि परिचयपत्र बनाइनेछ ।

यसअघि जिल्ला प्रशासन कार्यालयमै गएर तयार गरिएका राष्ट्रिय परिचयपत्रहरू अब सम्बन्धित व्यक्तिहरूको स्वयम् उपस्थितिमा कुमाख गाउँपालिकाको कार्यालयबाट वितरण गरिने बताइएको छ ।

परिचयपत्र वितरण कार्यक्रममा जिल्ला समन्वय समिति सल्यानका प्रमुख बेलाराम रावल, कुमाख गाउँपालिकाका अध्यक्ष मान बहादुर बुढाथोकी, प्रमुख जिल्ला अधिकारी नेत्र प्रसाद सुवेदी, गाउँपालिका उपाध्यक्ष लाल बहादुर रावत, सुरक्षा निकायका प्रमुखहरू तथा नेपाल पत्रकार महासङ्घ सल्यानका अध्यक्ष डिल्लीराज रावतले मन्तव्य राखेका थिए ।

कार्यक्रममा प्रमुख जिल्ला अधिकारी सुवेदी र जिल्ला समन्वय समिति प्रमुख रावलले पूर्ण बहादुर राना र भीम बहादुर रानालाई राष्ट्रिय परिचयपत्र वितरण गरेका थिए ।

गाउँपालिकाका एमआईएस अपरेटर मेघराज रावतका अनुसार आगामी असोज १२ गतेसम्म कुमाख गाउँपालिका भित्रका सबै ज्येष्ठ नागरिक तथा अपाङ्गता भएका, अशक्त व्यक्तिहरूको परिचयपत्र तयार गरिनेछ ।

कार्यक्रममा प्रमुख प्रशासकीय अधिकृत दिलिप कुमार सोनीले पालिकाले हालसम्म गरेका काम तथा सेवा प्रवाहको अवस्था बारे जानकारी दिएका थिए ।