खोज

चन्द्रौटा, ०४ असोज ।

नेपाल–भारत सीमावर्ती क्षेत्र कपिलवस्तुमा दिनहुँ काठ तस्करी हुने गरेको छ । सीमाको निगरानी कडा भए पनि तस्करको जालोले प्रहरी र प्रशासन छक्काउन सफल छ । यसप्रति आम नागरिकले प्रश्न उठाउने गरेको छन् ।

सीमा नाकामा अहिले काठ तस्करी नियन्त्रण गर्न सुराकी सहितको संयुक्त अभियानमा चलाइएको छ । तस्करी नियन्त्रण गर्न सुराकीको आधारमा गरिएको संयुक्त अभियानमा प्रहरीले खैरो काठ बरामद गरेको छ ।

जिल्लाको विजयनगर गाउँपालिका–७, गेडुवाजोत नजिकैको सीमा पिल्लर नम्बर ५७७/५ को झाडीभित्र लुकाइ राखिएको १२ वटा खैरो काठ ठकुरापुर प्रहरी चौकी, साझेदारी वन ठकुरापुर, सशस्त्र प्रहरी बल डालपुर र इलाका प्रहरी गणेशपुरको संयुक्त टोलीले बिहीबार साँझ नियन्त्रणमा लिएको हो ।

करिब ६ बजेतिर सुराकीको आधारमा गरिएको अभियानमा बरामद काठको मूल्य करिब ६० हजार रुपैयाँ हुने अनुमान गरिएको प्रहरीले जनाएको छ । सीमावर्ती क्षेत्र भारतसँग प्रत्यक्ष जोडिएको हुँदा विभिन्न गाउँ र बस्ती तस्करीका लागि सहज नाका बन्दै आएका छन् ।

रातको समयमा भारतीय जङ्गलबाट ल्याइएका खैरो, सिसौ र सहगवनका काठ तस्करहरूले झाडी, पराल वा गोठमा लुकाएर राख्ने र बिहानै जिल्लाका काठ स–मिल तथा फर्निचर उद्योगमा पु¥याउने गरेको प्रहरीको भनाइ छ ।

जिल्लाको पश्चिमी सिमाना लालपुर, गेडुवाजोत, दत्तपुर ठकुरापुर र परशुरामपुर घाट लगायत स्थान हुँदै तस्करी हुने क्रम बढेको स्थानीयको भनाइ छ । यसअघि पनि सो क्षेत्रबाट पटक पटक काठ बरामद हुँदै आएको छ  भने प्रहरीले काठ तस्करी नियन्त्रणलाई प्राथमिकतामा राखेको जनाएको छ ।

विजयनगर–६, ७ र कृष्णनगर–१२ भारतीय जङ्गलसँग जोडिएकाले यी क्षेत्रमा तस्करीको जोखिम उच्च रहेको छ ।