खोज

बुटवल ।

शैक्षिक परामर्श दिदै आएको चैतन्य एकेडेमी बुटवल शाखाले शुक्रबार ‘संविधान संवाद’ कार्यक्रम गरेको छ । १० औं संविधान दिवस–२०८२ को अवसरमा बुटवलको देविनगरस्थित एकेडेमीमा राष्ट्रिय मानव अधिकार आयोग लुम्बिनी प्रदेश कार्यालयका सह–सचिव सन्तोष आचार्यले औपचारिक उद्घाटन गर्दै संविधानलाई केवल कागजमा लेखिएको दस्तावेजको रूपमा नभई नागरिकको जीवनसँग प्रत्यक्ष जोडिएको व्यवहारिक दस्तावेजको रूपमा बुझ्न आवश्यक रहेको बताए ।

“शिक्षा, स्वास्थ्य, रोजगारी, समानता र अभिव्यक्ति स्वतन्त्रता संविधानद्वारा सुनिश्चित गरिएका मौलिक अधिकार हुन् तर तिनीहरूको प्रभावकारी कार्यान्वयन अझै आवश्यक छ ।” उनले भने ।

विद्यार्थीसँगको अन्तरक्रियामा उनले संविधानको अध्ययन केवल लोकसेवा तयारीको लागि नभई जीवनभर नागरिक चेतना जागृत गराउने माध्यम भएको दाबी गरे ।

कार्यक्रममा चैतन्य एकेडेमी बुटवल शाखा प्रमुख दिपक ढकालले संविधानप्रति जागरुकता फैलाउन विद्यार्थीहरूमा संस्कार बसाल्नुपर्नेमा जोड दिए । यस्ता कार्यक्रमहरूले विद्यार्थीहरूलाई व्यवहारिक रूपमा सचेत नागरिक बन्न प्रेरणा दिने बताउँदै कार्यक्रमलाई निरन्तरता दिने प्रतिबद्धता व्यक्त गरे ।

कार्यक्रममा मानव अधिकार आयोगका अधिकृत सागर पोखरेल र सुरक्षित नेपालका अध्यक्ष कृष्णप्रसाद बेल्बासे, शेषकान्त अर्यालले संविधान संवाद कार्यक्रमबाट व्यावहारिक जीवनमा पनि जिम्मेवार र सचेत नागरिक बन्ने प्रेरणा मिल्ने बताए ।

यसैबिच लोकसेवा आयोगमा सफलता हासिल गरेका विद्यार्थी वसन्त गिरीलाई विशेष सम्मान गरिएको थियो । हाल गिरी भैरहवा यातायात व्यवस्था कार्यालयमा प्रशासन सहायक (चौथो तह) मा कार्यरत छन् ।