खोज

कपिलवस्तु, ०३ असोज ।

जेनजी आन्दोलनको क्रममा गत भदौ २५ गते कपिलवस्तु कारागारबाट ठुलो सङ्ख्यामा कैदी थुनुवा फरार भएसँगै चोरी र लुटपाटको घटना बढ्न सक्ने भन्दै स्थानीयले गाउँ गाउँमा पहरा दिन थालेका छन् ।

पछिल्लो समय आन्दोलनकै कारण सुरक्षा निकाय विशेष स्थानमा केन्द्रित हुन थालेपछि स्थानीयले रातभर आलो–पालो गरी पहरा दिन थालेका छन् । चोरी र लुटपाटको घटना हुन सक्ने होहल्लाका कारण रातीमा पहरा दिन थालिएको कपिलवस्तु नगरपालिका वडा नम्बर २ का रामईन्द्र मुराउले बताए ।

बुधबार राती चोर आएको हल्ला पछि आफूहरू रातभर नसुतेको उनले जनाए । त्यसैगरि जिल्लाको शिवराज नगरपालिका–३ खरेन्द्रपुरका युवाहरूले गाउँको सुरक्षाका लागि रातभर पहरा दिन थालेका छन् ।

पछिल्ला दिनमा चोरीका घटना बढ्न सक्ने आशङ्काले स्थानीय बासिन्दा सतर्क बन्दै युवाहरूलाई सक्रिय रूपमा सुरक्षा जिम्मेवारी लिने काममा प्रेरित गरेको हो । स्थानीय मङ्गरु विश्वकर्माले गाउँको टोल टोलमा युवाहरू पालैपालो ड्युटी बसेर पहरा दिने गरेको बताए ।

गाउँको धनमाल, घर तथा सम्पत्तिलाई चोरीबाट सुरक्षित राख्ने उद्देश्यले युवाहरू रातभर जागा बस्दै आएको उनले स्पष्ट पारे । गाउँमा सुरक्षा पहरा दिने कार्यमा सोमनाथ चौधरी, बलिराम थारु, काशीराम यादव, प्रकाश थारु, महेराज धोबीलगायतका युवाहरू सक्रिय रूपमा सहभागी हुने गरेका छन् ।

उनीहरूले समूह बनाएर प्रत्येक रात पालैपालो गाउँका गल्ली र टोलमा ड्युटी गर्ने गरेका छन् । छिमेकी मुलुक भारतका विभिन्न स्थानमा चोरीको हल्ला फैलिएको र यसले सीमा नजिकैका बस्तीलाई प्रभावित पार्न सक्ने सम्भावनाले यहाँका नागरिक सतर्क बनेका हुन् ।

नेपाल–भारत सीमावर्ती क्षेत्रमा सुरक्षाको चासो बढेसँगै युवाहरू स्वयंसेवकका रूपमा सक्रिय भई गाउँको शान्ति, सुरक्षामा योगदान दिइरहेका छन् । चोरी, डकैती र अनैतिक गतिविधि रोक्न नागरिकमा सचेतना बढ्नु र नागरिक प्रहरी सहकार्यको वातावरण बन्नुलाई सकारात्मक रूपमा लिनुपर्ने जिल्ला प्रहरी कार्यालय कपिलवस्तुका प्रवक्ता प्रहरी नायब उपरीक्षक रिपेन्द्र कुमार सिंहले बताए ।

आन्दोलन यता जिल्लाको मायादेवी गाउँपालिका १ पकडीमा चोरी गर्दै गरेको अवस्थामा एक जनालाई रंगेहात पक्राउ गरेको बाहेक अन्य स्थानमा चोरीको घटना नभएको नायब उपरीक्षक सिंहले स्पष्ट पारे ।

चोरी, डकैती र अन्य घटनालाई रोक्नका लागी प्रहरीको गस्ती र पैदल गस्तीलाई बढाइएको उनले जनाए ।