खोज

नेपालगन्ज, ३ असोज ।

नेपालको संविधान २०७२ को विकल्प खोज्न नसकिने नेपालगन्जका सरोकारवालाले बताएका छन् । ११ औँ संविधान दिवसको अवसरमा शुक्रबार नेपालगन्जमा आयोजित कार्यक्रममा सरोकारवालाले आफ्नो धारणा राख्दै संविधान नेपाली जनताले आफैँले बनाएको महत्त्वपूर्ण उपलब्धि भएकाले यसलाई संस्थागत गर्दै समयानुकूल सुधार गर्नुपर्नेमा जोड दिए ।

वक्ताहरूले संविधान उत्कृष्ट भए पनि जेन–जी आन्दोलनमार्फत उठेका मागलाई संशोधन प्रक्रियामा समेटेर मुलुकलाई सही दिशामा अघि बढाउनुपर्नेमा जोड दिए ।

कार्यक्रममा नेपाल कानुन व्यवसायी परिषद् लुम्बिनी प्रदेश पार्षद इश्वरीप्रसाद ज्ञवाली, नेपाल पत्रकार महासङ्घ लुम्बिनी प्रदेश अध्यक्ष शुक्र ऋषि चौलागाई, महासङ्घ बाँके अध्यक्ष नवीन गिरी, नेपालगन्ज उद्योग वाणिज्य सङ्घका पूर्व अध्यक्ष कृष्णप्रसाद श्रेष्ठ, मानवअधिकारकर्मी प्रकाश उपाध्याय, वरिष्ठ लेखक तथा पत्रकार नरेन्द्र जङ्ग पिटर, अधिवक्ता विश्वजित तिवारी, अधिवक्ता सुनिता शर्मा, मोहम्मद अयुव सिद्दिकी, पत्रकार शरण कर्माचार्य, विजय मल्ल, अधिकारकर्मी कमला पन्त, विनोद थापा, बेपत्ता परिवारका सदस्य चन्द्रकला उप्रेती र गैरसरकारी संस्था महासङ्घ बाँकेका रमेश सिटौला लगायतले आफ्ना विचार राख्दै संविधानमा रहेका असन्तुष्टि र कमजोरीलाई संशोधनमार्फत समाधान गर्न सकिने भएकाले नेपालको संविधान २०७२ को विकल्प खोज्न नसकिने बताएका थिए ।

कार्यक्रममा नेपालगन्जका नागरिक अगुवा, कानुन व्यवसायी, पत्रकार, अधिकारकर्मी र बुद्धिजीवीहरूको उल्लेख्य उपस्थिति रहेको थियो ।