खोज

बुटवल, २ असोज ।

जेनजी समूहको आन्दोलनका क्रममा लुम्बिनी प्रदेशका विभिन्न जिल्लामा सरकारी सवारीसाधनमा अभूतपूर्व क्षति पुगेको छ । प्रारम्भिक तथ्याङ्कअनुसार ६ सयभन्दा बढी सवारीसाधन पूर्णरूपमा नष्ट भएका छन् ।

आन्दोलनका क्रममा सबैभन्दा ठूलो क्षति बाँकेमा भएको देखिन्छ । नेपालगन्ज भन्सार कार्यालयमा लिलामका लागि राखिएका दुई सयभन्दा बढी कार, भ्यान र मोटरसाइकल जलेर वा तोडफोड भएर ध्वस्त भएका छन् । उपमहानगरपालिका र कोहलपुर क्षेत्रका एम्बुलेन्ससहित करिब एकसय सवारीसाधन नष्ट हुँदा बाँकेमा मात्र तीन सयभन्दा बढी सवारीसाधन क्षतिग्रस्त भएका हुन् ।

त्यस्तै दाङ दोस्रो ठूलो प्रभावित जिल्ला बनेको छ । यहाँ १८९ सवारीसाधनमा क्षति पुगेको प्रारम्भिक विवरणले देखाउँछ । तीमध्ये ४० चारपाङ्ग्रे र १३४ दुईपाङ्ग्रे सरकारी साधन पूर्णरूपमा नष्ट भएका छन् ।

अन्य जिल्लाको तुलनामा रुपन्देहीमा सरकारी सवारी साधनको क्षति कम देखिएको छ । रुपन्देहीमा लोकसेवा आयोगका चारवटा गाडी तथा मोटरसाईकल र स्कुटर गरी ११ वटा, राष्ट्रिय बाणिज्य बैंक, गौतमबुद्ध अन्तर्राष्ट्रिय विमानस्थल, श्रम कार्यालय र इलाका प्रशासन कार्यालय बुटवलको एक–एकवटा गाडी आगजनीबाट पूर्णरुपमा नष्ट भएको छ । त्यस्तै प्रहरीका २७ वटा मोटरसाईकल तथा सहरी विकास मन्त्रालय अन्तर्गतको एउटा मोटरसाईकल पनि आगजनीबाट नष्ट भएको छ ।
गौतमबुद्ध अन्तर्राष्ट्रिय विमानस्थलमा रहेको एउटा सरकारी गाडीमा आगजनी भएको छ ।

यद्यपि जिल्ला प्रशासन कार्यालय रुपन्देहीले भने क्षतिको यकिन तथ्यांक अझै आइनसकेको जनाएको छ । प्रमुख जिल्ला अधिकारी टोकराज पाण्डेले क्षति भएका सवारी साधनको तथ्यांक संकलन गर्ने कार्य भैरहेको भन्दै एक–दुई दिनभित्रै यकिन विवरण आउने बताए ।

पश्चिम नवलपरासीमा पाँचवटा चारपाङ्ग्रे र १५ वटा दुईपाङ्ग्रे गरी २० वटा सरकारी सवारीसाधनमा क्षति भएको छ ।

बर्दियामा नगरपालिकाका दमकल, ट्याक्टर, एम्बुलेन्स र ११ वटा सरकारी मोटरसाइकल पूर्णरूपमा नष्ट भएका छन् । अर्घाखाँचीमाँ भने पाँचवटा सरकारी सवारीसाधन पूर्ण रूपमा ध्वस्त भएका छन् ।

कपिलबस्तुमा ६ वटा सरकारी सवारी साधन आगजनीबाट ध्वस्त भएका छन् । प्रदर्शनकारीले जिल्ला अदालतमा रहेका पाँचवटा गाडी र एउटा मोटरसाईकल आगजनी गरी ध्वस्त बनाएका हुन् । रुकुमपूर्व, रोल्पा, प्यूठान, पाल्पा र गुल्मीमा भने कुनै सवारीसाधन नष्ट भएको छैन ।