खोज

सुर्खेत,२ असोज । 

सुर्खेतका पाँच राजनीतिक दलहरूले भोली (शुक्रवार) संयुक्त रूपमा संविधान दिवस मनाउने भएका छन् । सुर्खेतमा रहेका नेपाली काँग्रेस, एमाले, माओवादी केन्द्र, एकीकृत समाजवादी र राष्ट्रिय जनमोर्चाले संयुक्त विज्ञप्ति जारी गर्दै संयुक्त रूपमा दिवस मनाउने जनाएका हुन् ।

जसको लागि उनीहरूले शुक्रवार (भोली) साढे एक बजे जिल्ला समन्वय समितिको हलमा अन्तर संवाद कार्यक्रमको आयोजना गर्ने जनाएका छन् । त्यसै गरी बेलुका ६ बजे वीरेन्द्र चोकमा दीप प्रज्वलन गर्ने कार्यक्रमको तय गरेका छन् ।

यस्तै दिवसकै दिनमा सबै पालिकाहरूमा संविधान दिवस मनाउने बताइएको छ ।  यस्तै प्रतिनिधिसभा विघटन गर्नु संवैधानिक सर्वोच्चता र संविधानमाथि प्रहार गरेको उनीहरूले निष्कर्ष निकालेका छन् ।

भदौ २७ गते राती वर्तमान प्रतिनिधिसभा विघटन गरिएको भनी राष्ट्रपति कार्यालयबाट जारी भएको विज्ञप्तिप्रति गम्भीर ध्यानाकर्षण र असहमति रहेको नेकपा एमाले सुर्खेतका अध्यक्ष कुलमणी देवकोटाले बताए ।

‘नेपालको संविधान तथा प्रचलित कानुन बमोजिम सुशासनको माग राखेर भएको आन्दोलनको मर्म विपरीत अलोकतान्त्रिक तथा असंवैधानिक ढङ्गले संसद् छलेर सडकबाट सरकार गठन र प्रतिनिधिसभाको विघटन गरिएको छ,’ देवकोटाले भने,‘लोकतान्त्रिक र कानुनी राज्यमा सबै प्रकारका समस्याको समाधान संविधान र कानुन बमोजिम हुनुपर्ने र सबै निकायहरू संविधान र कानुन बमोजिम सञ्चालन हुनुपर्दछ भन्ने कुरामा हाम्रो अटल विश्वास रहेको छ ।’

नेपाली जनताको लामो सङ्घर्ष र बलिदानीबाट प्राप्त लोकतन्त्र र संविधान सभाबाट जारी भएको सङ्घीय लोकतान्त्रिक गणतन्त्रात्मक संविधान विपरीतका कदमलाई कुनै पनि मूल्यमा स्वीकार गर्न नसकिने नेपाली काँग्रेस सुर्खेतका उपसभापति टोपबहादुर रावतले जनाए ।

आन्दोलनका क्रममा सार्वजनिक सम्पत्ति ऐतिहासिक धरोहर, राजनीतिक दलहरूका कार्यालय र व्यक्तिगत सम्पत्तिमा भएको आगजनी, तोडफोड, लुटपाट र हिंसाका घटनाहरूप्रति दलहरूले निन्दा गरेका छन् ।

राजनीतिक दलहरूले घटनामा भएको जनधनको क्षतिका सम्बन्धमा छानबिन गरी सो कार्यमा संलग्नलाई कानुन बमोजिम कारबाही गर्न सम्बद्ध निकायको गम्भीर ध्यानाकर्षण पनि गराएका छन् ।

विषम परिस्थितिमा मुलुकलाई एकताबद्ध बनाउँदै राष्ट्र राष्ट्रियता र लोकतान्त्रिक गणतन्त्रको रक्षाका लागि सबै एकजुट हुनुको विकल्प नरहेको राजनीतिक दलहरूको निष्कर्ष रहेको छ ।