खोज

काठमान्डौ, ३१ भदौ ।

भारतको हिमाञ्जल प्रदेशको शिमला जिल्लास्थित कोटखाई नजिक पिकअप जिप दुर्घटना हुँदा चार नेपालीसहित पाँच जनाको मृत्यु भएको छ । दुर्घटनामा दुई जना घाइते भएका छन् ।

मृत्यु हुनेमा सल्यानको कुमाख गाउँपालिका–४ का ५० वर्षीय डिल्लीबहादुर शाही, ३६ वर्षीय एकेन्द्र शाही, २६ वर्षीय लक्ष्मी मल्ल शाही र ३३ वर्षीय राजेश विष्ट रहेका छन् । यस्तै, जिप चालक ४५ वर्षीय भारतीय नागरिक जोगिन्दर सिंहको पनि घटनास्थलमै ज्यान गएको भारतीय प्रहरीले जनाएको छ ।

त्यसैगरी घाइते हुनेमा नवराज शाही र हिमबहादुर शाही रहेका छन् । उनीहरूलाई प्रारम्भिक उपचारपछि कोटखाई स्वास्थ्य केन्द्रबाट डिस्चार्ज गरिएको छ । मृतकमध्ये तीन जना एकै परिवारका सदस्य भएको पुष्टि भएको छ ।

प्रारम्भिक अनुसन्धानअनुसार चालकले नियन्त्रण गुमाउँदा जिप भीरमा खसेको बताइएको छ । दुर्घटनापछि गम्भीर घाइते भएकी लक्ष्मी शाहीलाई अस्पताल पुर्‍याइए पनि उपचारका क्रममा निधन भयो । त्यस्तै, डिल्लीबहादुर शाहीलाई इन्दिरा गान्धी मेडिकल कलेज अस्पताल पठाइए पनि मृत्यु भएको हो ।

द हिन्दुस्तान टाइम्सका अनुसार शवलाई पोस्टमार्टमका लागि पठाइएको छ र मृतकका आफन्तलाई सूचना दिइएको छ । यसबीच, हिमाञ्चल प्रदेशका मुख्यमन्त्री सुखविन्दर सिंह सुखुले विज्ञप्ति जारी गर्दै घटनाप्रति गहिरो शोक प्रकट गरेका छन् । उनले शोकसन्तप्त परिवारप्रति संवेदना व्यक्त गर्दै आवश्यक सहयोग उपलब्ध गराइने आश्वासन दिएका छन् ।