खोज

 काठमाडौं, ३१ भदौ ।

जेनजी आन्दोलनपछि पार्टी नेतृत्वको औचित्यबारे बहस चलेको अवस्थामा नेकपा माओवादी केन्द्रका उपमहासचिव जनार्दन शर्माले अध्यक्ष पुष्पकमल दाहाल ‘प्रचण्ड’ को तत्काल राजीनामा मागेका छन् ।

पार्टीभित्र केही समयदेखि रुपान्तरणको कुरा गर्दै आएका शर्मा जेनजी आन्दोलनपछि वर्तमान नेतृत्वको औचित्य नरहेको निष्कर्षमा पुगेका हुन् । उनी भन्छन्, जेनजी आन्दोलनले सकारात्मक सन्देश दिएकाले पार्टी नेतृत्व परिवर्तन हुनु आवश्यक छ ।

शर्माले यस विषयमा पार्टी पंक्तिमा छलफल समेत सुरु गरेका छन् । छलफलमा सहभागी एक कार्यकर्ताले भने, ‘जेनजी आन्दोलनले थिग्रिएको भ्रष्टाचारयुक्त राजनीति र संस्कृतिमाथि प्रहार गरेको छ । नयाँ नेतृत्व खोजिएको छ, त्यसलाई सकारात्मक रूपमा लिनुपर्छ । अहिलेको परिस्थितिमा पार्टीको मूल नेतृत्वले तत्काल राजीनामा दिनुपर्छ ।’

भ्रष्टाचार र सुशासनका मागसहित जेनजी युवाहरूले सामाजिक सञ्जालमार्फत अभियान चलाएर भदौ २३ गते काठमाडौंमा प्रदर्शन गरेका थिए । माइतीघरबाट नयाँबानेश्वरतर्फ गएको जुलुस प्रहरी घेरा तोड्दै संसद् भवन पुगेपछि हिंसात्मक बनेको थियो । त्यसको भोलिपल्ट प्रधानमन्त्री केपी शर्मा ओलीले राजीनामा दिएका थिए ।

जेनजी आन्दोलनपछि मंगलबार पहिलोपटक सार्वजनिक भएका माओवादी केन्द्रका अध्यक्ष प्रचण्डले पार्टी केन्द्रीय कार्यालय अवलोकन गरेका छन् ।

जनार्दनले पार्टी शीर्ष नेताहरूको कार्यशैली, जीवनशैली र नेतृत्वमा प्रश्न उठाउँदै आएको बताएका छन् ।  उनका अनुसार जेनजी आन्दोलनले लोकतन्त्र, नेतातन्त्र, कमिसनतन्त्र र दलालीका सबै पक्ष उजागर गरेको छ, र अब देशलाई नयाँ ढंगले अगाडि बढाउने बाटो खुलेको छ ।  यसैले वर्तमान सरकारलाई सहयोग गर्दै निर्वाचनको वातावरण तयार गर्नु आवश्यक रहेको उनको तर्क छ ।

पूर्वप्रधानन्यायाधीश सुशीला कार्की नेतृत्वको अन्तरिम सरकारले आगामी फागुन २१ गते प्रतिनिधि सभा निर्वाचन गर्ने निर्णय गरिसकेको छ ।

जनार्दनले पार्टीभित्र सम्पत्ति छानबिनबारे विगतदेखि राखेको माग कार्यान्वयनका लागि स्वतन्त्र व्यक्तिको नेतृत्वमा आयोग गठन गर्नुपर्ने बताएका छन् ।

उनी गत साउनमा बसेको केन्द्रीय समिति बैठकमा पनि प्रचण्डमाथि प्रश्न उठाइसकेका छन्, तर बहुमतले अस्वीकृत गरेको थियो ।

प्रचण्डपक्षले भने जनार्दनमाथि पार्टीमा अराजकता मच्चाएको आरोप लगाउँदै आएको छ । जनार्दनले जेनजी आन्दोलनबारे गरेको संश्लेषण र आगामी बाटो यसप्रकार देखाएका छन्:

• जेनजी आन्दोलनले थिग्रिएको भ्रष्टाचारयुक्त राजनीति र संस्कृति प्रहार गरेको सकारात्मक रूपमा लिनुपर्छ ।
• दलतन्त्र, नेतातन्त्र, कमिसनतन्त्र र दलालीका सबै पक्ष उजागर भएकाले देशलाई नयाँ ढंगले अगाडि बढाउने बाटो खुलेको छ ।
• वर्तमान सरकारलाई सहयोग गर्दै निर्वाचनको वातावरण बनाउनुपर्छ ।
• पार्टीभित्र सम्पत्ति छानबिनका लागि स्वतन्त्र आयोग गठन गर्नुपर्छ ।
• २०४६ पछि पदमा बसेका सबै क्षेत्रका निवृत्तहरूको सम्पत्ति छानबिन र जेनजी आन्दोलनमा भएको जनधन क्षतिको उच्चस्तरीय आयोग गठन गर्नुपर्ने ।
• पार्टीको मूल नेतृत्वले तत्काल राजीनामा दिनुपर्छ ।
• नेतृत्व निर्वाचन प्रणाली प्रत्यक्ष निर्वाचित मोडेलमा लैजानुपर्छ ।
• पदमा बस्ने व्यक्ति र पटक संख्या स्पष्ट नीति अनुसार तय हुनुपर्छ ।
• पूर्ण समानुपातिक निर्वाचन प्रणालीमार्फत संसद् निर्माण गर्न राजनीतिक बहस प्रारम्भ गर्नुपर्छ ।
• प्रत्यक्ष निर्वाचित कार्यकारी राष्ट्रपतिसम्बन्धी कुरामा जोड दिनुपर्छ ।
• दलित महिलाका समस्याहरू समाधानका लागि स्पष्ट दृष्टिकोण बनाउनुपर्छ ।
• साँस्कृतिक बिचलन र यौन अराजकतासम्बन्धी घटनाको छानबिन गर्नुपर्छ ।
• शहीद, बेपत्ता, घाइते, अशक्त र वृद्ध परिवारहरूको संरक्षण नीति बनाउनुपर्छ ।
• श्रम र आर्थिक उत्पादन सम्बन्धी नीति र कार्यक्रममार्फत स्वरोजगार अभियान सुरु गर्नुपर्छ ।
• राष्ट्रियता संकटमा रहेकाले पार्टीलाई सतर्क राख्नुपर्छ ।
• उपर्युक्त लक्ष्यअनुसार संगठन निर्माण गर्नुपर्छ ।