खोज

शुक्रबार राती प्रधानमन्त्री नियुक्त सुशीला कार्कीले आइतबारदेखि कार्यभार सम्हालेकी छिन । कार्कीलाई जटिल अवस्थामा देशको नेतृत्व गर्ने अवसर आएको छ । भनिन्छ– राजनीतिमा असम्भव भन्ने हुँदैन ।

जम्मा ७२ घण्टाको समयावधिमा कल्पनासम्म नगरिएको घटनाक्रम विकसित हुँदा कार्की सडकबाट सिंहदरबारको बागडोर सम्हाल्न पुगिन । अव कार्कीलाई सरकारलाई सफल बनाउने मात्रै होइन, मुलुकलाई सही दिशामा अघि बढाउने ठुलो दबाब र दायित्व सिर्जना भएको छ ।

त्यसका निम्ति उनले सरकारलाई गति दिनुपर्ने अवस्था छ । अव मुलुकलाई एक ढिक्का बनाएर अगाडि बढाउनु कार्कीको लागि ठुलो चुनौती हुनेछ । कार्कीको सत्ता यात्रा सहज छैन । विशेष परिस्थितिमा प्रधानमन्त्रीसँग यस पटक चौतर्फी चुनौती हुनेछन् । शासन सञ्चालनमा देशले नैतिक मूल्य तथा मान्यताको अपेक्षा गरेको छ ।

देशको अवस्था सुधार गर्ने मात्र होइन, समग्र लोकतान्त्रिक पद्धतिप्रति उत्पन्न हुन लागेका आशङ्कालाई गलत साबित गर्नुपर्नेछ । हिजो भए गरेका बेठिक काम र व्यवहार कार्की सरकारबाट दोहोरिए भने त्यो जनताका लागि स्वीकार्य हुँदैन ।

अहिले कार्कीको हातमा सत्ता एउटा भिन्न परिस्थितिमा आएको छ । अबको दिनमा दलहरूलाई मिलाएर मुलुकलाई निर्वाचनमा लिएर जानु कम चुनौतीको विषय होइन । किनभने अहिले दलहरू संसद् विघटनबाट आक्रोशित छन् ।

दलहरूको बटमलाईन अहिलेसम्म सार्वजनिक भएको छैन । तर, देशले निकास खोजेको बेला दलहरूलाई साथमै लिएर अघि बढ्ने प्रयत्न भयो भने त्यो कार्की सरकारका लागि सफलताको द्योतक हुनेछ ।

अतः प्रधानमन्त्री कार्कीले आफूलाई कति खरो उतार्न सक्छिन्, त्यसबाट सरकार र देशको पनि भविष्य निर्धारण हुनेछ । सरकारको सफलता असफलता प्रमाणित हुनेछ । कार्कीमाथि अर्को चुनौती छ– समयमै निर्वाचन सम्पन्न गर्नु । यो कठिन चुनौती पार लगाउन उनलाई दह्रो साथ र सहयोगको खाँचो छ ।

सरकारको नेतृत्व गर्ने जिम्मेवारी पाएकी कार्कीलाई लोकतान्त्रिक शासन व्यवस्थाको आदर्श प्रदर्शन गर्ने यो अवसर पनि हो । अव विधिसम्मत ढङ्गले सरकार सञ्चालन हुनुपर्छ । लोकतन्त्रमा पारदर्शिता पहिलो सर्त हुनुपर्छ । देशलाई भ्रष्टाचारमुक्त बनाउने सङ्कल्प कार्कीका लागि राम्रो अवसर हुनेछ ।

देशमा देखापरेका विकृति, विसङ्गति, अस्थिरता लगायतका यावत समस्या नियन्त्रण र समाधानमा उनको नेतृत्वको सरकारका चुनौती हुन । यो ऐतिहासिक एवं महत्त्वपूर्ण अवसर उनका लागि इतिहास निर्माण गर्ने मौका पनि हो ।

नयाँ सरकार जनउत्तरदायी हुनुपर्ने अपेक्षाका बिच देशको समग्र अवस्थामा परिवर्तन उनको मुख्य चुनौती हो ।  अहिले देश आर्थिक मन्दीको आहालमा छ । युवाहरू विदेश पलायन भइरहेका छन् ।

नेपालमै उनीहरूलाई रोक्ने योजना सरकारसँग छैन । अबको दिनमा खोक्रो आश्वासन र नारामा अव नेपाली जनता दिग्भ्रमित हुने अवस्था छैन । जेनजी पुस्ताले देशमा उथलपुथल खोजेको छ । जेनजी पुस्ताको भावनालाई आत्मसाथ गर्नुपर्ने आवश्यकता पनि सरकारका लागि चुनौतीकै विषय हुनेछ ।

युवा वर्ग पछिल्लो राजनीतिसँग विश्वस्त नहुनाकै कारण आज यो अवस्था आएको छ । कुरा मात्र गर्ने राजनीति अव युवाहरूले मन पार्नै छाडेका छन् । जनतामा निराशा बढ्दै गएको छ ।

हरेक बेथितिका पछाडि साना–ठुला नेताको आड भरोसा छ । अव मुलुकमा वास्तविक सुशासन र समृद्धि कहिले आउँछ ? प्रश्न अनुत्तरित छ । अव कार्की नेतृत्वको सरकारले जति छिटो निर्वाचन गरि जनताले चुनेका जनप्रतिनिधिलाई शासन सत्ता सुम्पिने वातावरण बन्छ, अनि देशले नयाँ काँचुली फेर्छ भन्ने विश्वास गर्नुपर्ने अवस्था छ ।

तसर्थ कार्की नेतृत्वको सरकारले राजनैतिक दलहरूलाई विश्वासमा लिएर निर्वाचनमा अग्रसर बनाउने वातावरण बनाउनुपर्दछ । लोकतन्त्रमा दलहरूको विकल्प दलहरू नै हुन । अतः निर्धारित मितिमै निर्वाचन गराएर कार्की नेतृत्वको सरकारले आफ्नो अभिभारा पूरा गरोस् । सरकारलाई हार्दिक शुभकामना ।