खोज

नेपालगञ्ज, ३० भदौ ।

बाँकेका दुई बाल सुधारगृह र क्षेत्रीय कारागारबाट भागेका ३४२ जना बालबन्दी तथा कैदीमध्ये २८५ जना अझै फरार रहेका छन् । भागेकामध्ये हालसम्म ५७ जनामात्र पक्राउ परेका छन् ।

बैजनाथ गाउँपालिकास्थित नौबस्ता बाल सुधारगृह र डुडुवाको जयन्दु बाल सुधारगृहबाट १९३ जना बालबन्दी भागेका थिए । तीमध्ये ४० जना पक्राउ परेका छन् । त्यस्तै, नौबस्ता क्षेत्रीय कारागारबाट भागेका १४९ मध्ये १७ जना मात्रै पक्राउ परेका छन् । जयन्दु बाल सुधारगृहका प्रमुख किशोर शर्माका अनुसार, सुधारगृहमा रहेका २२८ बालबन्दीमध्ये ११५ जना भागेका थिए । हालसम्म २३ जना पक्राउ परेका र बाँकी ९२ जनाको खोजी भइरहेको उनले बताए । फरारमध्ये केही आफै सम्पर्कमा आएका छन् भने केहीलाई विभिन्न स्थानबाट पक्राउ गरिएको उनको भनाइ छ ।

नौबस्ता बाल सुधारगृहका प्रमुख श्यामबहादुर रानाका अनुसार, सुधारगृहमा रहेका १७६ बालबन्दीमध्ये प्रहरीसँगको झडपमा पाँच जनाको मृत्यु भएको थियो भने ७९ जना भागेका थिए । तीमध्ये हालसम्म १७ जना मात्रै पक्राउ परेका छन् । अझै ६२ जनाको खोजी जारी छ । यसैगरी, नौबस्ता क्षेत्रीय कारागारका प्रमुख जालन्धर भुषालका अनुसार, त्यहाँ रहेका ५८५ कैदीमध्ये १४९ जना भागेका थिए । तीमध्ये १७ जना पक्राउ परेका र १३२ जना अझै फरार रहेको बताइएको छ ।

जिल्ला प्रहरी कार्यालय बाँकेले फरार कैदी र बालबन्दीमध्ये धेरैजना सीमापार पुगेको आशंका गरिएको जनाएको छ । जेन जी आन्दोलनको क्रममा उग्रता मच्चीएपछि बाँकेलगायत देशका विभिन्न बाल सुधारगृह र कारागारबाट कैदी–बन्दी भागेका थिए ।

यद्यपि नेपालगञ्ज कारागारमा भने कैदीहरु भग्न प्रयास गरेपनि सेनाको घेराबन्दीका कारण भाग्न असफल भएका थिए । सो क्रममा सेनाले गोली चलाउँदा कैलालीका एक कैदीको खुट्टामा गोली लागेको थियो ।