खोज

बुटवल, ३० भदौ । 

एक सातादेखि रोकिएको २३ औँ लिस्नु कप २०८२ प्रतियोगिताका खेलहरू मङ्गलवारदेखि हुने भएका छन् । देशमा उत्पन्न प्रतिकुल परिस्थितिका कारण रोकिएका दुई सेमिफाइनल र फाइनल खेलहरू मंगलबारबाट हुने भएको हो ।

यशोदा फुड्स प्रालिको मुख्य प्रायोजन, तिलोत्तमा नगरपालिकाको सह प्रयोजन तथा लिस्नु युवा क्लबको आयोजनामा जारी प्रतियोगिताको पहिलो सेमिफाइनल खेल गोर्खा ब्याईज बुटवल र अञ्चलपुर युवा क्लब सिद्धार्थनगरका बिचमा हुने प्रचार संयोजक सुमन गुरुङले बताए ।

टिमहरू सम्पर्कमा आउने र दर्शकहरूलाई सामाजिक सञ्जालबाट जानकारी दिने कामहरू भएको उनले बताए । तिलोत्तमा नगरपालिका–१५, कोटिहवा स्थित पशुपति माविको खेलमैदान लगातारको वर्षाका कारण पनि केही खराब भएको छ ।

मैदान तयार गर्नेका सकेको क्लबका अध्यक्ष तीर्थराज मल्लले बताए । ‘रोकिएका खेलहरू अब सुचारु हुन्छ ।’–उनले भने । यसै गरी बुधबार दोस्रो सेमिफाइनल खेल फर्साटिकर युवा क्लब र अभिषेक चर्च रहजरका बिचमा हुने छ ।

प्रतियोगिताको विजेता टिमले नगद ४ लाख ४ हजार ४ सय ४४ रुपैयाँ तथा उपविजेताले नगद २ लाख २ हजार २ सय २२ रुपैयाँसहित ट्रफी, प्रमाणपत्रबाट पुरस्कृत गरिने खेल संयोजक पदमबहादुर थापाले बताए ।

यसै गरी सर्वोत्कृष्ट खेलाडीलाई २५ हजार, उत्कृष्ट गोलरक्षकलाई १२ हजार ५ सय, सर्वाधिक गोलकर्तालाई १२ हजार ५ सय, राइजिङ खेलाडीलाई १२ हजार ५ सय र प्रत्येक दिनको सर्वोत्कृष्ट खेलाडीलाई ५ हजार, अनुशासित टिमलाई आकर्षक ट्रफी प्रदान गरिनेछ ।

भदौ १४ देखी २७ गतेसम्म सञ्चालन हुने प्रतियोगितामा आयोजक लिस्नु युवा क्लब तिलोत्तमा, झरना स्पोट्र्स क्लब तिलोत्तमा, फर्साटिकर एफसी, फर्साटिकर, भैरहवा अञ्चलपुर युवा क्लब सिद्धार्थनगर, सम्पूर्ण युवा क्लब तिलोत्तमा–१४, सुपौली, अभिषेक चर्च, रजहर नवलपरासी, गोर्खा ब्याईज बुटवल, देवदह ब्याईज खैरेनी, वालिङ–११ वालिङ नगरपालिका, पाल्पा–११ पाल्पा, नवलपरासी–११ नवलपरासी र कपिलवस्तु–११, कपिलवस्तु गरी १२ वटा टिमको सहभागिता रहेको छ ।