खोज

जितपुर, २८ भदौ ।

कपिलवस्तुको बाणगंगा नगरपालिका–४ चार नम्बर बजार क्षेत्रमा जेन–जी आन्दोलनका क्रममा जम्मा भएको फोहोर ग्यालेक्सी यूथ क्लबले सरसफाइ गरेको छ । सोमबार र मंगलबार भएको आन्दोलनका कारण बजार क्षेत्रमा थुप्रिएको प्लास्टिक, कागजलगायत फोहोर सङ्कलन गरी व्यवस्थापन गरिएको क्लबले जनाएको छ ।

ग्यालेक्सी यूथ क्लबका अध्यक्ष अमृत गिरीका अनुसार बजारलाई सफा र सुन्दर बनाउनका लागि क्लबका सदस्य तथा स्थानीय युवाहरू स्वयंसेवी रूपमा अभियानमा जुटेका थिए । उनका अनुसार आन्दोलनपछि तत्काल सफा अभियान चलाउन जरुरी भएकाले टोली सक्रिय भएको हो ।

क्लबकी सचिव प्रतीक्षा गैरेका अनुसार सरसफाइ कार्यक्रममा ५० भन्दा बढी युवाहरू सहभागी भएका थिए भने करिब ५० बोरा फोहोर सङ्कलन गरिएको छ । पिपरा इलाका प्रहरी कार्यालयका प्रहरीहरूले समेत सहयोग प्रदान गरेका थिए ।

उनका अनुसार हालै आन्दोलनमा सक्रिय रहेका युवाहरूले आगामी दिनमा क्षति पुगेका सार्वजनिक सम्पत्ति मर्मत र पुनर्निर्माणमा पनि सहयोग गर्ने योजना बनाएका छन् ।

ग्यालेक्सी यूथ क्लब पछिल्लो एक वर्षदेखि सामाजिक रूपान्तरणका विभिन्न अभियानमा सक्रिय रहँदै आएको छ । ‘सफा कपिलवस्तु अभियान’ अन्तर्गत नियमित सरसफाइ कार्यक्रम सञ्चालन गर्दै आएको क्लबले क्यान्सर पीडितका लागि सहयोग, अनाथ बालबालिकाको सहारा तथा जनचेतनामूलक कार्यक्रम पनि गर्दै आएको छ ।

२१ वर्षीय युवा अभियन्ता अमृत गिरीको नेतृत्वमा सक्रिय यो क्लब हाल युवाहरूको साझा सामाजिक मञ्च बनेको छ। स्थानीय बासिन्दाले क्लबको सरसफाइ अभियानलाई प्रशंसा गर्दै बजारलाई निरन्तर सफा राख्न सबैलाई आह्वान गरेका छन् ।