खोज

दाङ,२७ भदौ

दाङका विभिन्न स्थानमा भोलि बिहान ५ बजेसम्म कर्फ्यु आदेश जारी भएको छ । जिल्ला प्रशासन कार्यालय दाङका अनुसार आज साँझ( शुक्रबार ) ५ बजेदेखि दाङमा भोली बिहान ५ बजेसम्मलाई कर्फ्यु आदेश जारी गरिएको हो ।

दाङका विभिन्न स्थानमा भएको प्रदर्शन, जुलुस, तथा सम्भावित हिंसात्मक गतिविधि नियन्त्रण गर्न दाङका प्रमुख जिल्ला अधिकारी  विश्वप्रकास अर्यालले कर्फ्यु आदेश जारी गरेका छन्  ।

प्रमुख जिल्ला अधिकारी विश्व प्रकाश अर्यालले सुरक्षा अवस्था हेरेर फेरि कर्फ्युको समय थप गरिएको बताए । कर्फ्युकोे समयमा सकेसम्म घर बाहिर ननिस्कन अनुरोध गरिएको छ ।

जेनजीको आन्दोनलनका कारण स्थिति असमान्य बनेपछि दाङको प्रमुख बजार तुलसीपुर, घोराही, लमही र भालुवाङ क्षेत्रमा मंगलबारदेखि कर्फ्यु जारी रहेको छ । स्थानीय प्रशासन ऐन, २०२८ को दफा ३ बमोजिम चार किल्ला तोकी सो सिमा भित्र कसैले आवतजावत गर्न कुनै प्रकारको भेला, जुलुस, प्रदर्शन, सभा, बैठक, घेराउ गर्न नपाउने उल्लेख छ ।

तुलसीपुर उपमहानगरपालिका क्षेत्र भित्र पूर्वमा हात्तिखौवा, पश्चिममा कृष्ण मन्दिर, उत्तरमा आँखा अस्पताल र दक्षिण एअरपोर्टसम्म प्रतिबन्ध लगाएको छ । घोराही उपमहानगरपालिका क्षेत्रमा झिगौरा चोक, प्रहरी बोर्डिङ स्कुलदेखि गोरखा बोर्डिङ स्कुल नजिकको कटुवा खोला पुल, मितेरी हस्पिटलदेखि रझेना स्कुलसम्म र फुर्सेखाली–ढोरेनी स्कुलदेखि सेवार खोलापुलसम्म प्रतिबन्ध लगाएको छ ।

लमही नगरपालिका क्षेत्रमा पूर्वमा अर्नवा, पश्चिममा अर्जुन खोला पुल र दक्षिणमा कोलही पुलसम्म, राप्ती गाउँपालिका क्षेत्रमा प्रदेशसभा, मुख्यमन्त्री  तथा मन्त्रिपरिषद्को कार्यालय रहेको क्षेत्रमा प्रतिबन्ध लगाएको छ । यस्तै भालुबाङ बजार क्षेत्रभित्र, पश्चिममा गोपिनाल, पूर्वमा भालुवाङ पुलसम्म प्रतिबन्ध लगाइएको छ ।