खोज

काठमाडौं, २६ भदौ ।
जेनजी युवाहरूले अन्तरिम सरकारको नेतृत्वका लागि प्रस्ताव गरेकी पूर्वप्रधानन्यायाधीश सुशीला कार्कीले राष्ट्रिय हितका लागि काम गर्न तयार रहेको जनाएकी छन् । उनले युवाहरूले आफूप्रति देखाएको विश्वासप्रति आभार व्यक्त गरिन् ।

भारतीय टेलिभिजन च्यानल न्यूज १८ सँग कुरा गर्दै ७१ वर्षीया कार्कीले भनिन्, “जेनजी समूहले मलाई छोटो अवधिका लागि सरकारको नेतृत्व गर्न विश्वास गर्‍यो । म राष्ट्रिय हितका लागि काम गर्न तयार छु ।”

सन् १९७५ मा भारतको वाराणसीस्थित हिन्दु विश्वविद्यालय (बीएचयू) बाट राजनीति शास्त्रमा स्नातकोत्तर गरेकी कार्कीले भारतसँग आत्मीय सम्बन्ध रहेको बताइन् । उनले भनिन्, “भारतीय साथीहरूले मलाई दिद बहिनी जस्तै व्यवहार गर्छन् ।”

भारतीय प्रधानमन्त्री नरेन्द्र मोदीसहितका नेताबाट प्रभावित भएको उल्लेख गर्दै उनले थपिन्, “मैले बीएचयूमा पढेकी हुँ । त्यहाँका साथीहरू र शिक्षकहरू अझै सम्झिन्छु ।

भारतसँग हाम्रो सम्बन्ध ऐतिहासिक र आत्मीय छ । भारतले नेपाललाई निरन्तर सहयोग गरेको छ र भारतीयहरूले सधैं नेपालको भलो नै चाहेका छन् ।”

भ्रष्टाचारविरुद्ध र सामाजिक सञ्जाल प्रतिबन्धविरुद्ध भएको आन्दोलनमा सरकारी दमनका क्रममा १९ जनाको मृत्यु भएपछि कार्की पनि सडकमा उत्रिएकी थिइन् ।

सर्वोच्च अदालतमा काम गर्ने अनुभव स्मरण गर्दै उनले सामूहिकतामा विश्वास गर्ने बताइन् । “सर्वोच्चमा रहेर मैले सधैं सामूहिक रूपमा काम गरेकी छु । भविष्यमा पनि यही भावनासहित जिम्मेवारी पूरा गर्नेछु,” कार्कीले भनिन् ।