खोज

काठमाडौँ ।

राष्ट्रिय स्वतन्त्र पार्टी (रास्वपा) का सभापति रवि लामिछानेले आफू नख्खु कारागारबाट स्वेच्छाले ननिस्किएको दाबी गरेका छन् । उनले कारागार प्रशासनले भिड नियन्त्रण गर्न नसक्ने अवस्थामा आफूलाई जबरजस्ती बाहिर निकालेको स्पष्ट पारेका छन् ।

मंगलबार नख्खु कारागारबाट निस्किएपछि सार्वजनिक गरिएको एक भिडियो सन्देशमार्फत लामिछानेले भने, “मैले बिनापत्र जान्न सक्दिन भनेको थिएँ । तर कारागारले जस्तो पत्र दियो, त्यो जस्ताको त्यस्तै सार्वजनिक गरिसकेको छु ।”

उनले पुनः कारागार जान तयार रहेको बताउँदै नेपाल प्रहरी र सशस्त्र प्रहरीका प्रमुखहरूलाई आफूलाई नियन्त्रणमा लिन वा कारागारमा फर्काउन आग्रह गरेको पनि खुलाए ।

तर, सुरक्षाका लागि जिम्मेवार निकायहरूले “तपाईं आफैँ सुरक्षित रहनुहोस्, सुरक्षा दिन सक्दैनौं” भन्ने जवाफ दिएको उनी बताउँछन् । यसै कारण उनले न्यायिक निकायहरूलाई घटनाबारे जानकारी गराइसकेको दाबी गरेका छन् ।

रवि लामिछानेले आफूमाथि भइरहेका कारबाहीहरूलाई राजनीतिक प्रतिशोधको निरन्तरता बताएका छन् । उनले आफू सरकार बनाउने वा कुनै सत्ताको दौडमा नरहेको स्पष्ट गर्दै भने, “कसैसँग कुनै बैठक गरेको छैन ।

मेरो नाममा विवाद गर्नु आवश्यक छैन। म कुनै रेसमा छैन, यो देश रहनुपर्छ, लोकतन्त्र रहनुपर्छ, नागरिक सर्वोच्चता रहनुपर्छ ।”

उनले जेनजी आन्दोलनको नेतृत्व युवाहरूले नै गर्नुपर्ने बताएका छन् । आफू कानुनी लडाइँ लडिरहेको र त्यही बाटोबाट अन्यायको प्रतिकार गर्ने अडान दोहोर्‍याएका छन् ।

“ओली, देउवा र गगनहरूले लगाएका झुटा मुद्दा अझै झेलिरहेको छु,” भन्दै उनले ती नेताहरूको कूशासनको प्रत्यक्ष शिकार आफू भएको बताए ।

कारागारबाट निस्केपछि उनले आफू असुरक्षित महसुस गरिरहेको पनि बताए। “सरकार छैन, सुरक्षा निकाय सुरक्षा दिन सक्दैनन्, कारागार ‘जा’ भन्छ, बाहिर भिड छ, आगो बोकेको आक्रोश छ अब भन्नुस्, म बाँच्न पाउँछु कि पाउँदिन ?” उनले प्रश्न गरे ।

लामिछानेले देश, लोकतन्त्र र नागरिक अधिकारप्रति आफ्नो प्रतिबद्धता दोहोर्‍याउँदै भने, “मानव अधिकार, व्यक्तिगत स्वतन्त्रता, सुशासन, खुला र पारदर्शी समाज यी लोकतन्त्रका आधारभूत स्तम्भहरूमा म कहिल्यै सम्झौता गर्दिन ।”

उनले आफू सधैं जनताको आमनेसामने रहेको, कठिन समयमै पनि नलुकेर लड्ने अठोट लिएको र राजनीतिमा भुइँमान्छेको हैसियतमा आएको स्पष्ट पारे । “कालकोठरीमा थुन्दा पनि मैले भ्रष्टाचारविरुद्ध लल्कार्ने हिम्मत राखेको छु, यो नबिर्सिनुहोस्,” भन्दै लामिछानेले अडान जनाए ।

उनका अनुसार पछिल्ला केही दिनमा झन्डै ४० लाख नागरिकले राजनीतिक प्रतिशोधविरुद्ध हस्ताक्षर गरी ऐक्यबद्धता जनाएका छन् । “म संसद्बाट त निकालीएँ, तर जनताको मनबाट म हटेको छैन,” भन्दै उनले सन्देशको अन्त्य गरेका छन् ।