काठमाडौं,२५ भदौ ।
जेनजी आन्दोलनको क्रममा नयाँ सरकारको नेतृत्वका लागि पूर्वप्रधानन्यायाधीश सुशीला कार्कीको नाम अघि सारिएको छ । उक्त प्रस्तावमा काठमाडौं महानगरपालिकाका मेयर बालेन्द्र (बालेन) शाहले पनि समर्थन जनाएका छन् ।
जेनजीका प्रतिनिधिहरूले कार्कीलाई नागरिक सरकारको सम्भावित नेतृत्वका लागि प्रधानसेनापति अशोकराज सिग्देलसमक्ष प्रस्ताव गरेका थिए ।
जटिल र संवेदनशील राजनीतिक परिवेशमा लोकतान्त्रिक मूल्य र कानुनी प्रक्रिया जोगाउन सक्षम, इमानदार छविकी व्यक्तित्व आवश्यक भएको भन्दै कार्कीको नाम अघि सारिएको बताइएको छ ।
बुधबार दिउँसो जेनजी प्रतिनिधिहरूले कार्कीको नाम प्रस्ताव गरेपछि सोहीबेला जंगीअड्डा परिसरमा जम्मा भएका केही युवाहरूले भने त्यसविरुद्ध नाराबाजी गरेका थिए । उनीहरूले मेयर बालेन शाहसहित अन्य नाम पनि अघि सारेका छन् ।
जेनजीका सदस्यहरूले बुधबार दिनभर सामाजिक सञ्जाल, विशेषगरी डिस्कर्ड प्लेटफर्ममार्फत नेतृत्व चयनबारे छलफल गरेका थिए ।
ती छलफलमा सुशीला कार्कीको पक्षमा बलियो समर्थन देखिएको भए पनि, बालेन शाहको नाम पनि बारम्बार उठाइएको थियो । तर, उनी प्रत्यक्ष सम्पर्कमा नआएको भन्ने गुनासो केही सहभागीहरूले गरेका छन् ।
मंगलबार साँझ बालेनले सामाजिक सञ्जालमा एक स्टाटस लेख्दै जेनजीलाई सेना प्रमुखसँग वार्ता गर्न तयार रहन सुझाव दिएका थिए ।
त्यसको भोलिपल्ट बुधबार बिहान जेनजी प्रतिनिधिमण्डल वार्ताका लागि जंगीअड्डा पुगेको थियो । तर, १५ जनाभन्दा बढी प्रतिनिधि पुगेकाले प्रधानसेनापति सिग्देलले उनीहरूलाई पहिले आपसमा सहमति गरेर संयोजक तोकेर आउन अनुरोध गरेका थिए । त्यसपछि जंगीअड्डाकै एउटा कोठामा बैठक बसेको थियो ।
छलफलको क्रममा केही समूहले गणतान्त्रिक व्यवस्थाविरुद्ध समेत प्रस्ताव राखेको जनाइएको छ, जसका कारण रक्षा बमसहितको एक समूह बैठकबाट बाहिरिएको थियो । अन्ततः सुशीला कार्कीको नेतृत्वमा नागरिक सरकार बनाउनेबारे प्रारम्भिक सहमति जुटेको स्रोतले जनाएको छ ।
