खोज

रोल्पा, २२ भदौ ।

रोल्पा उद्योग वाणिज्य सङ्घको अध्यक्षमा वसन्त सुवेदी सर्वसम्मत चयन भएका छन् । सङ्घको भदौ २० र २१ गते सम्पन्न नवौँ अधिवेशनले सुवेदीको अध्यक्षतामा नयाँ कार्यसमिति सर्वसम्मत चयन गरेको हो ।

सर्वसम्मत निर्वाचित कार्यसमितिको वरिष्ठ उपाध्यक्ष मिलन रोकामगर र उपाध्यक्ष वसन्ता आचार्य चयन भएका छन् । कार्यसमितिको महासचिव इन्द्रवहादुर महरा, सचिव रमेश अधिकारी र कोषाध्यक्ष ओवि केसी चयन भएको रोल्पा उद्योग वाणिज्य सङ्घ निर्वाचन समितिका संयोजक तुलसीराम जी.सी.ले जानकारी दिए ।

कार्यसमितिको सदस्यहरूमा राजेन्द्र कक्षपती, सुरेन्द्र थापा, अशोक आचार्य, राजन श्रेष्ठ, शिवराज आचार्य, विशेष जि.सी. लगायत रहेका छन् ।
२०४९ सालमा स्थापना भएको रोल्पा उद्योग वाणिज्य सङ्घको नेतृत्व चयनमा केही समय यता मतदान हुँदै आएको थियो ।

नवौँ अधिवेशन मार्फत सम्पूर्ण उद्योगी व्यवसायीहरूलाई एक ढिक्का बनाई सर्वसम्मत नेतृत्व चयन गर्न सफल भएको निवर्तमान अध्यक्ष केशव आचार्यको भनाई छ । संस्थापक अध्यक्षको रूपमा तिलक केसीले नेतृत्त्व गरेको रोल्पा उद्योग वाणिज्य सङ्घमा त्यसपछि किशोर कुमार आचार्य, बालकृष्ण सुवेदी, विश्वकुमार चन्द हुँदै केशव आचार्यले नेतृत्व गरी सकेका छन् ।

रोल्पाको सुनिलस्मृती गाउँपालिका–२ का वसन्त सुवेदी लामो समय व्यापार व्यवसायमा संलग्न सफल व्यवसायी हुन् ।  एक्काइसौँ साधारण सभा र नवौँ अधिवेशन उद्घाटन सत्र नेपाल उद्योग वाणिज्य सङ्घका लुम्बिनी प्रदेश अध्यक्ष कृष्णप्रसाद शर्माले सम्भावनै सम्भावना भएको जिल्लामा सम्भावनाका खोजी गर्न नसक्नु उद्योगी व्यवसायीहरूका लागि पनि सुखद नभएको बताए ।

रोल्पा द्वन्द्व पर्यटनको दृष्टिकोणले धेरै सम्भावना बोकेको जिल्ला भएको उनको भनाई छ । दश स्थानीय तह भएको रोल्पामा हरेक पालिकामा फरक फरक विशेषता सहितको सम्भावना भएको उनको भनाइ थियो । रोल्पा जहाँको माटो, हावापानी र जनताहरूको मनोविज्ञान धनी छ त्यही गरिबीको कुरा गरेर हिँडिरहेका छौँ उनले भने ।

निजी क्षेत्र उक्सन नसके स्थानीय सरकार पनि उक्सन नसक्ने बताउँदै निजी क्षेत्रमैत्री कर प्रणाली अपनाउन रोल्पाका स्थानीय तहहरूलाई आग्रह गरे ।  कार्यक्रममा रोल्पा नगरपालिकाका नगर प्रमुख सुरेन्द्र थापा घर्तीले करको विषयमा विगतमा रोल्पा नगरपालिका र रोल्पा उद्योग वाणिज्य सङ्घ बिच केही असमझदारी भए पनि त्यसलाई टेबुलमा बसेर हल गरिएको बताए ।

अझै पनि कुनै विषयमा असमझदारी भए बसेर छलफल गरौँ उनले उद्योगी व्यवसायीहरूलाई आग्रह गरे । हामीले असोज सम्म पुरै छुट दिने, पौष सम्म पचास प्रतिशत छुट दिने र त्यसपछि विलम्ब शुल्क सहित कर लिने गरी सहमति गरेका छौँ उनले भने ।

रोल्पामा कतै वनेका सामान ल्याएर केही प्रतिशत नाफा कमाउने उद्देश्यले गरिने व्यापारको मात्रै बाहुल्यता रहेको बताउँदै आफै उत्पादन गरेर बिक्री वितरण गर्ने गरी उद्योग व्यवसाय सञ्चालन गर्न आग्रह गरे ।