खोज

चन्द्रौटा, २१ भदौ ।

“श्रीमानलाई ४ जना मिलेर तन्नामा बोकेर दिसा पिसाब गराउने गर्दथियौँ । महिनौँसम्म काठमाडौँमा  उपचार गर्दै बसेका थियौँ । निको नभएपछि घर फकियौँ ।

कष्टकर दैनिकी बित्दै जाँदा चन्दौटामा थेरापी खुलेको जानकारी पाएपछि डा. नरेश चौधरीलाई घरमै बोल्यौँ उहाँले उपचार गर्दा केही सुधार आएको छ – कपिलवस्तुको बुद्धभुमि नगरपालिका वडा नम्बर ९, धमौलीकी मनकुमारी थारुले भनिन् महिनौँ दिनसम्म काठमाडौँ उपचार गरेर पनि निको नभएपछि श्रीमान् लिएर घर फर्किएको उनी बताउँछिन् ।

५२ वर्षको उनको श्रीमानसँगै दैनिकी राम्रै चल्दै थियो तर परिवारको स्वास्थ्य अवस्था बिग्रिएपछि कसैको केही नलाग्दो रहेछ । उनले थपिन-  “श्रीमानलाई हिँड्न, बस्न, सुत्न सबैमा कठिनाइ हुने गर्थ्यो । हामीले बिहानदेखि बेलुकीसम्म स्याहारसुसारमै बिताउँथ्यौँ ।

स–साना कामका लागि पनि अन्यको सहयोग लिनुपर्ने अवस्था थियो । घरमा अन्य कामकाज थाती राखेर सबै ध्यान उहाँकै उपचारमा लगाइएको थियो ।”

उपचार गराउनुप¥यो तर खासै सुधार भएन । त्यो समयमा परिवारका सबै जना मानसिक रूपमा निकै आघातमा परेका थियो । तर अहिले उपचारपछि सुधार देखिन थालेको थारुले बताइन् ।

अब श्रीमान् आफैँ केही काम गर्न सक्ने भएको छ । हिँड्दा–फिर्दा सजिलो भएको छ । यसले हामीलाई फेरि सामान्य जीवनयापन गर्ने आशा दिलाएको उनको भनाई छ ।

यस्तै शिवराज नगरपालिका वडा नम्बर–५ की आशा थापाले आफ्नो घाँटी दुख्ने समस्या रहेको बताउँछिन् ।

स्वाद नपाउने, टाउको हल्लाउन नसक्ने, थुक निल्न नसकिने जस्ता समस्या रहेको रहेको उनले बताइन् । वर्षौँदेखि उपचार गरेर पनि सन्चो नभएपछि भौँतारिएको थापाले जिकिर गरिन् ।

“घाँटीमा लगातार असहज महसुस हुन्थ्यो,” उनले सम्झिइन्, “औषधि खाएँ, विभिन्न डाक्टर देखाएँ तर दीर्घकालसम्म राहत पाइएन ।

कहिलेकाहीँ श्वास फेर्नै गाह्रो हुने, बोल्दा आवाज बदलिने र सामान्य जीवनयापनमै समस्या हुने अवस्था आयो ।” उनले थपिन्, “यत्रा–यात्रा गर्दा, घरायसी काम गर्दा पनि सधैँ डर लाग्थ्यो– कतिखेर समस्या अझ बढ्छ भनेर ।

उपचारमा धेरै खर्च गर्दा पनि परिणाम नआएपछि निकै निराश भएको थिएँ । अब भने सही उपचार पाउने आशामा छु ।”

डा. नरेश चौधरीले छोटो समयमा आफूले गरेको कार्यले सन्तुष्ट मिलेको बताए । जीवन ज्योति फिँजियो थेरापी सञ्चालन गरेको करिब १ वर्ष भएको उनले बताए ।

प्यारालाइसिस, अर्थोपेडिक लगायतको दिनहुँ थुप्रै बिरामी आउने गरेको डा. चौधरीले बताए । उनले भने- “यहाँ आउने धेरै बिरामीहरू लामो समयसम्म अस्पताल धाउने, औषधि खाने वा बेडमा सुतिरहनु परेको अवस्थामा हुन्छन् ।

तर नियमित थेरापी र सही उपचार विधिबाट छोटो समयमा सुधार देखिन्छ । बिरामी मात्र नभई उनका परिवारजनले पनि ठुलो राहत पाएका छन् ।”

डा. चौधरीले थपे-“हामीले यो सेवा सुरु गर्दा गाउँमै यस्ता सुविधा आवश्यक रहेको महसुस ग¥यौँ । यस अवधिमा धेरै बिरामीहरूलाई उपचार दिन सफल भएका छौँ ।

यसले मलाई पेसागत मात्र होइन, मानवीय सन्तुष्टिसमेत दिएको छ । प्यारालाइसिस, अर्थोपेडिक समस्या, नशा सम्बन्धी समस्या, घुँडामा दुखाइ, घाँटी र कम्मर दुखाइका बिरामीहरू बढी आउँछन् ।”

दैनिक ४० देखि ५० बिरामी सेवा लिने गरेका छन् । आउने अधिकांश बिरामी उपचारपछि सामान्य जीवनतर्फ फर्कन सकिरहेका छन् ।