खोज

बुटवल, २१ भदौ ।
श्री नेवाः सेवा समितिले मृगौला पीडितहरुलाई एक लाख रुपैया बराबरको खाद्यान्न सामग्री वितरण गरेको छ । चाडपर्व नजिकिएसंगै समस्यामा परेका मृर्गौला उपचारमा रहेको ३० जना परिवारलाई शनिबार चामल, दाल, चिउरा लगायतका खाद्यान्न हस्तान्तरण गरेको हो ।

कार्यक्रममा गौतम बुद्घ सामुदायिक मटु अस्पतालका अध्यक्ष एजाज आलमले नेपालमा मात्र नभई विश्वमा नै मृगौलाको बिरामीहरु बढ्दो क्रममा रहेको बताए । ‘प्रत्येक १० जनामा एक जना कुनै न कुनै समस्या देखिने गर्छ ।’–उनले भने । वर्षमा एकपटक भएपनि परिक्षण गरे ठुलो समस्या हुनबाट जोगिन सकिने उनले बताए । दुबै मृगौला खराब भएपछिमात्र एकैपटक थाहा लाग्ने समस्या हुन्छ । सरकारबाट गर्ने काम स्थानिय संघसंस्थाहरुबाट भैरहेको उनले बताए। मृगौलाबारे सचेतना जरूरी रहेको उनले बताए । ‘अझ बिरामीहरुमा मनोबल उच्च बनाउन जरुरी छ ।’– उनले भने ।
कार्यक्रममा बुटवल उपमहानगरपालिका वडा नं ११ का वडासदस्य नहकुल शाहीले कृषि उब्जनीमा बिषादीको प्रयोग अत्याधिक बढ्दा यसको उपभोगबाट मानिसहरुमा दीर्घरोगीहरुको संख्या बढेको बताए ।

कार्यक्रममा समितिका अध्यक्ष डिल्ली कुमार श्रेष्ठले संस्थाको वार्षिक कार्ययोजना अनुसार विविध रचनात्मक र समुदायस्तरमा गतिविधि गर्दै आएको बताए । कार्यक्रममा मुटु तथा मृगौला पिडित सरोकारवाला समुहका अध्यक्ष कृष्ण मल्लले चाडपर्व नजिकिरहेको बेला पिडामा मलहम लगाउने गरि महत्वपुर्व कार्यक्रम भएको बताए ।

समाजका संस्थापक अध्यक्ष रमेश केसीले खानपिन र जिवनशैलीका कारण बिरामीको संख्या बढेको बताए । डायलोसिसको ठुलो चाप हुदा समस्या देखिएको उलने बताए । रुपन्देहीमा ४०० बढि नियमित डायलोसिस गराउनेहरु रहेको उनले बताए । नियमित आय हुन गरि रोजगार सृजनाको वातावण स्थानिय सरकारसंगै संघसस्थाबाट गर्न उनले सुझाव दिए ।

कार्यक्रममा समितिका सल्लाहकार रामलाल श्रेष्ठले आफु पनि मृगौला सम्बन्धी पिडाबाट गुज्रेको अनुभव सुनाउदै अधिकास दीर्घरोगबाट शारिरिकसंगै मानसिक पिडा हुने गरेको बताए । नेवारी संस्कार, संस्कृति जगेर्ना गर्ने उदेश्यका साथ स्थापना भएको संस्था समुदायमा रहेर काम गर्दै आएको उनले बताए ।

कार्यक्रममा समाजका निवर्तमान अध्यक्ष चिरञ्जीवी श्रेष्ठ, समितिका वरिष्ठ उपाध्यक्ष दल बहादुर श्रेष्ठ, सचिव लक्ष्मण श्रेष्ठले संस्कृति संरक्षणसंगै समुदायसंग जोडेर विविध कार्यक्रममा संस्थागत रुपमा काम गर्दै आएको बताए ।