खोज

कपिलवस्तु, २१ भदौ ।

निजामती सेवा दिवस २०८२ को अवसर पारेर कपिलवस्तुको तौलिहवा स्थित तौलेश्वरनाथ संस्कृत मा.बि.मा विशेष कक्षामा अध्ययनरत बहिरा बालबालिकालाई शैक्षिक सामाग्री वितरण गरिएको छ ।

निजामती सेवा दिवस २०८२ का अवसरमा नेपाल निजामती कर्मचारी युनियन कपिलवस्तुको सहयोगमा जिल्ला समारोह समिति कपिलवस्तुको आयोजनामा विशेष कक्षाका १५ बालबालिकालाई झोला वितरण गरिएको हो ।

सहायक प्रमुख जिल्ला अधिकारी पदमलाल लामिछाने, नेपाल निजामती कर्मचारी युनियन कपिलवस्तुका अध्यक्ष झक बहादुर आले, सचिव राजेश कुमार शैनी, रमेश गौड्, विद्यालयका प्रअ पुजारी प्रसाद कुर्मी, कपिलवस्तु बहिरा सङ्घका अध्यक्ष रिन्कु गुप्ता लगायतले बहिरा विद्यार्थीलाई झोला वितरण गरेका हुन ।

सिमित श्रोत साधनमा सञ्चालित कक्षामा गत वर्ष २७ जना बालबालिका रहेकोमा यस वर्ष १५ जना बहिरा बालबालिका अध्ययनरत रहेको तौलेश्वरनाथ संस्कृत मा.बि. का प्रधानाध्यापक पुजारी प्रसाद कुर्मीले बताए ।

बहिरा बालबालिकाको शिक्षा प्राप्तिका लागी आवासीय श्रोत केन्द्रको आवश्यकता रहेको जनाउँदै ती विद्यार्थीलाई ड्रेस सहितका अन्य शैक्षिक सामाग्री सहयोग आवश्यक रहेको उनले जनाए ।

कक्षामा कपिलवस्तु नगरपालिकाले एक जना बहिरा दोभासेको व्यवस्था गरेको र अझै पनि श्रोत साधनको अभाव रहेको कपिलवस्तु बहिरा सङ्घका अध्यक्ष रिन्कु गुप्ताले बताए ।

विद्यालयमा ६ वर्ष मुनीका बालबालिका दुरीका कारण आउन समस्या पर्ने गरेकोले सम्बन्धित निकायले सो विषयलाई प्राथमिकता दिन उनले आग्रह गरे ।

आगामी दिनमा कक्षाका अध्ययनरत बहिरा बालबालिकालाई लक्षित गरी अन्य सहयोगका कार्यक्रम गर्न तत्पर रहने नेपाल निजामती कर्मचारी युनियन कपिलवस्तुका अध्यक्ष झक बहादुर आलेले प्रतिबद्धता जनाए ।

निजामती सेवा दिवस २०८२ को अवसरमा नेपाल निजामती कर्मचारी युनियन कपिलवस्तुको सहयोगमा यस विद्यालयमा बालबालिकालाई झोला, हस्पिटलका बिरामीलाई कर्मचारी सङ्गठनको सहयोगमा फलफूल वितरण तथा कर्मचारी मिलन केन्द्रले कपिलवस्तु बाल गृहमा शैक्षिक सामाग्री सहयोग लगायतको रचनात्मक कार्यमा सहयोग गरेको सहायक प्रजिअ पदमलाल लामिछानेले बताए ।

जिल्लामा दिवसलाई उत्साहपूर्वक मनाउने सन्दर्भमा विविध कार्यक्रम गरिएको र बहिरा बालबालिकाको लागी आवश्यक सहयोग गर्न सबैको तत्परता आवश्यक रहेको उनको भनाई थियो ।