खोज

गुल्मी, २० भदौ ।

गुल्मीको रेसुङ्गा विमानस्थलमा झन्डै डेढ महिनामा पुनः हवाई उडान सुरु भएको छ । प्रतिकुल मौसमका कारण अवरुद्ध बनेको हवाई उडान बिहीबारबाट सुचारु बनेको नेपाल वायु सेवा निगम रेसुङ्गा स्टेसन प्रमुख सुमन थापाले जानकारी दिएका छन् ।

बर्सादको समयमा खराब मौसम र बाक्लो हुस्सुका कारण जिल्लामा गत साउन १० गतेपछि उडान अवरुद्ध हुँदै आएको थियो । यस अघि आइतबार, मङ्गलबार , बिहीबार र शनिवार गरेर सातमा चार पटक उडानहुँदै आएकोमा अबदेखि केही समयसम्म सातामा एक पटक मात्र हवाई सेवा सञ्चालन हुने स्टेसन प्रमुख सुमन थापाले बताए ।

नेपाल वायुसेवा निगमका दुई वटा ट्विनअटर जहाज मर्मत हुँदै गरेको र हाल एउटा जहाज मात्र भएका कारण यस अघिको नियमित तालिकामा परिवर्तन गरी सातामा एक पटक बिहीबारलाई उडान तालिका बनाएको छ ।

गुल्मीको रेसुङ्गा विमानस्थलमा नेपाल वायुसेवा निगमले १८ सिट क्षमताको ट्विनअटर जहाजबाट काठमाडौँ देखि बिहान ६ः३० बजे र रेसुङ्गा विमानस्थलदेखि बिहान ७ः३० बजे हवाई उडान गर्दै आएको छ ।

निगमले काठमाडौँबाट गुल्मीका लागि ७ हजार पाँच सय रूपैंया र गुल्मीदेखि काठमाडौँका लागि ७ हजार तीन सय रुपैयाँ भाडा दर निर्धारण गरेको छ । रेसुङ्गा विमानस्थलमा दिउसोको समयमा अत्यधिक हावाको चाँपका कारण प्राविधिक दृष्टिकोणले बिहानको समयमा मात्र उडान हुने गर्दछ ।

गुल्मीमा हवाई उडान सुरु भएसँगै जिल्लामा आउने आन्तरिक एवं बाह्य पर्यटकहरूको सङ्ख्यामा समेत बृद्धि हुँदै गएको छ । १८ घण्टा लामो यात्रा गरेर राजधानी पुग्नुपर्ने बाध्यता रहेको यस क्षेत्रका नागरिकहरूले आकाश मार्गबाट ४५ मिनेटमै सहजै राजधानी आवतजावत गर्न सह बनेको छ ।

जिल्लामा हवाई सेवा लिने नागरिकहरूको चाँप पछिल्लो समयमा धेरै हुने गरेको छ ।  नियमित रूपमा हवाई उडान नहुँदा यहाँका नागरिकहरू भने समस्यामा परेका छन् । नेपाल वायुसेवा निगमले २०८० वैशाख २९ गतेदेखि गुल्मीमा व्यावसायिक रूपमा हवाई उडान गर्दै आएको छ ।