खोज

कपिलवस्तु, २० भदौ ।

निजामती सेवा दिवस २०८२ को अवसर पारेर कपिलवस्तुको तौलिहवा कबर्डहलमा जिल्लास्तरीय ब्याडमिन्टन प्रतियोगिता शुरु भएको छ ।

निजामती सेवा दिवस २०८२ जिल्ला समारोह समिति कपिलवस्तुको आयोजनामा दुई दिन सम्म चल्ने प्रतियोगिताको संयोजक कर्मचारी मिलन केन्द्र कपिलवस्तु तथा जिल्ला ब्याडमिन्टन सङ्घ कपिलवस्तुको संयोजन तथा कपिलवस्तु नगरपालिका, महाराजगन्ज नगरपालिका, बुद्धभुमी नगरपालिका र बिजयनगर गाउँपालिकाको सहयोग रहेको छ । प्रतियोगितामा पुरुष खुला तर्फ ३२ टोली, भेट्रान (४५ वर्ष माथि) तर्फ १५ टोली, निजामती पुरुष तर्फ १५ टोली र निजामती महिला तर्फ ५ टोलीले डबल्स नकआउटका आधारमा खेलमा प्रतिस्पर्धा गर्ने छन् ।

जिल्लास्तरीय ब्याडमिन्टनको कपिलवस्तु अदालतका न्यायाधीश रमेश शर्मा पौडेल र कपिलवस्तु नगरपालिकाका प्रमुख सुदिप पौडेलले ब्याडमिन्टन खेलेर प्रतियोगिताको उद्घाटन गरे । दिवसको अवसरमा ३ वटा इभेन्ट मेन्स डबल्स र १ वटा इभेन्ट निजामती महिला डबल्सको इभेन्ट आयोजना गरिएको कपिलवस्तुका प्रमुख जिल्ला अधिकारी दिल कुमार तामाङले जानकारी दिए ।

उद्घाटन कार्यक्रममा जिल्ला न्यायाधिवक्ता खिमानन्द गौतम, महाराजगन्ज नगरपालिकाका प्रमुख प्रशासकीय अधिकृत दिपेन्द्र रेग्मी, जिल्ला ब्याडमिन्टन सङ्घ कपिलवस्तुका अध्यक्ष दिनेश हमाल, प्रशिक्षक राजेश शाक्य सहित निजामती कर्मचारी र ब्याडमिन्टन खेलाडीहरूको सहभागिता रहेको थियो ।