खोज

लमही ,१९ भदौ ।

मानव बेचबिखन तथा ओसारपसारका घटना बढ्दै गएका छन् । महिला, बालबालिका तथा ज्येष्ठ नागरिक मन्त्रालयका अनुसार गएको आर्थिक वर्ष २०८१/८२ मा नेपाल प्रहरीले एक सय २७ जना पीडित प्रभावितलाई विदेश र स्वदेशका विभिन्न ठाउँबाट उद्धार गरेको छ ।

१० वटा जिल्लामा रहेका पुनर्स्थापना केन्द्रहरू मार्फत सात सय ५८ र ती जिल्लाका विभिन्न सङ्घसंस्थामार्फत दुई हजार सात सय ३२ जना गरी जम्मा चार हजार चार सय ९० जना पीडितको उद्धार र पुनः स्थापना गरिएको मन्त्रालयले सार्वजनिक गरेको ‘मानव बेचबिखन तथा ओसारपसार नियन्त्रण राष्ट्रिय प्रतिवेदन २०८१’ मा उल्लेख छ ।

यसै गरी, नेपाल–भारत सीमा नाकालगायत विभिन्न ठाउँमा रहेका सङ्घसंस्थाका सूचना केन्द्रहरूले सीमा सुरक्षा तथा चेक प्वाइन्टमा कार्यरत नेपाल प्रहरी, सशस्त्र प्रहरी बल लगायतका निकायको सहयोगमा दुई हजार सात सय ६६ जना महिला, एक हजार चार सय ३६ जना बालिका, १५ जना पुरुष र ८३ जना बालक गरी जम्मा चार हजार तीन सय जनालाई मानव बेचबिखन तथा ओसारपसारका लागि जोखिम भनी प्रारम्भिक पहिचान गरी उद्धार गरिएको मन्त्रालयले जनाएको छ ।

ती सूचना केन्द्रहरूले कुल ७७ हजार पाँच सय जनालाई मानव बेचबिखन र मानव तस्करीका विरुद्धमा परामर्श सेवा प्रदान गरेको मन्त्रालयका प्रवक्ता चक्रबहादुर बुढाले जानकारी दिए।मानव बेचबिखन बढ्नुको मुख्य कारण रोजगारी र आम्दानीका विकल्पको कमी हो । गाउँघरका युवती र महिलाहरू वैदेशिक रोजगारीमा जाने क्रममा तस्करीमा पर्न सक्ने जोखिम बढ्दो छ।  भारतसँगको खुला सीमा, सूचना र जनचेतनाको कमी, दलालहरूको सक्रियता, र सीमित अवसरका कारण गरिब समुदाय बढी प्रभावित हुन्छन् ।

उद्धारपछि पनि चुनौती

उद्धार गरेर मात्र समस्या समाधान हुँदैन । पीडितलाई पुनः स्थापना, आत्मनिर्भर बनाउन सीपमूलक तालिम, रोजगारीको अवसर, मनोपरामर्शजस्ता उपाय आवश्यक हुन्छन् । तर यी पक्षमा अझै पर्याप्त काम हुन सकेको छैन ।  धेरै पीडितहरू समाजमा पुनः एकीकरण हुन नसकेर पुनः जोखिममा पर्ने सम्भावना उच्च रहन्छ ।