खोज

पाल्पा, १६ भदौ ।

सरकारले डेंगु नियन्त्रणका लागि प्रारम्भिक तयारी गरेको दाबी गरे पनि प्रभावकारी रूपमा लागू हुन नसक्दा पाल्पामा संक्रमण दर तीव्र रूपमा बढ्दै गएको छ । लुम्बिनी प्रदेशभित्र डेंगु संक्रमणको दर हेर्दा पाल्पा सबैभन्दा अगाडि रहेको जिल्ला स्वास्थ्य कार्यालय पाल्पाले जनाएको छ ।

कार्यालयका अनुसार हालसम्म पाल्पामा स्थायी रूपमा बसोबास गर्ने २२४ जनामा डेंगु पुष्टि भएको छ भने बाहिरी जिल्लाबाट उपचारका लागि आएका ४७ जनामा समेत संक्रमण देखिएको छ ।

चालु वर्षको पहिलो आठ महिनाको तथ्यांकअनुसार डेंगु संक्रमितको संख्या सबैभन्दा धेरै पाल्पामै रहेको जिल्ला स्वास्थ्य कार्यालयका सूचना अधिकारी मधुसूदन भट्टराईले जानकारी दिए ।

पाल्पा अस्पताल, रामपुर अस्पताल, ताहुँ र खस्यौलीका प्राथमिक स्वास्थ्य केन्द्रहरू, मिसन अस्पताल तानसेन तथा लुम्बिनी मेडिकल कलेज प्रभासमा संक्रमितहरूको उपचार भइरहेको छ । पछिल्लो २० दिनको अवधिमा मात्रै ८७ जना नयाँ संक्रमित फेला परेको कार्यालयले जनाएको छ ।

डेंगु रोग एडीज जातको लामखुट्टेको टोकाइबाट सर्ने गर्दछ । यसको नियन्त्रणका लागि सरकारले ‘लामखुट्टे खोज, नष्ट गर’ र ‘झुल प्रयोग गर’ अभियान सञ्चालन गर्न निर्देशन दिए पनि स्थानीय तह, स्वास्थ्यकर्मी तथा आमनागरिकमा अपेक्षित सक्रियता देखिन नसक्दा संक्रमण फैलिएको स्वास्थ्य कार्यालयको निष्कर्ष छ ।

लामखुट्टेको बासस्थान नष्ट गर्ने, सरसफाइमा ध्यान दिने र सतर्कता अपनाउने हो भने डेंगु नियन्त्रणमा ल्याउन सकिन्छ । तर, जनचेतनाको कमी र सरकारी संयन्त्रको कमजोरीका कारण पाल्पामा डेंगु संक्रमण बढेको हो ।