खोज

बुटवल, १६ भदौ ।
रामनगरमा सम्पन्न प्रथम नकआउट सेभेन ए साईड फुटबल प्रतियोगिताको उपाधि चरङे युवा क्लबले चुमेको छ । रामनगर साकुरा युवा क्लबको आयोजनामा सोमबार भएको फाईनल खेलमा विशाल सन्दिप एफसी, देविनगरलाई १–० गोल अन्तरले पराजित गर्दै चरङेले उपाधि चुमेको हो । उपाधिसंगै चरङे नगद ५० हजार रुपैया, कप, मेडल, प्रमाणपत्रबाट पुरस्कृत भयो । उपविजेता विशाल सन्दिप भने नगद २५ हजार रुपैया, कप, मेडल, प्रमाणपत्रमा चित्त बुझायो ।

निक्कै प्रतिस्पर्धात्मक खेलमा चरङेको जितमा एकमात्र गोल सुदिप मगरले गरे । प्रतियोगितामा चरङेका बिक्रम रानामगर उत्कृष्ट गोलकिपर, चरङेकै सुदिप मगर सर्वाधिक गोलकर्ता र विशाल सन्दिप एफसी, देविनगरका मोहन बिक उत्कृष्ट खेलाडी घोषित भए ।

एक समारोहका बिच समाजसेवी बिनोद गुरुङ, नेपाली काग्रेस पार्टी वडा नं १० सभापति क्या किशन बहादुर थापा, सयपत्री युवा क्लबका अध्यक्ष विशाल काउचाले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरेका छन ।

युवा खेलाडीलाई प्लेटफर्म दिने उदेश्यका साथ प्रतियोगिता आयोजना गरिएको क्लबका अध्यक्ष प्रेम बहादुर रानाले बताए । खेल गतिविधिमार्फत युवाहरुलाई जोड्ने गरि कार्यक्रम गरिएको उनले बताए । भदौ ३ गतेबाट शुरु भएको प्रतियोगितामा १९ टिमले भाग लिएको खेल संयोजक मिन बहादुर गुरुङले बताए ।