खोज

काठमाडौँ ।

कात्तिक १७ मा हुने रुपन्देही-३ को उपनिर्वाचनका लागि राष्ट्रिय स्वतन्त्र पार्टीले आफ्नो उम्मेदवारको टुंगो लगाएको छ।

पार्टीको आन्तरिक निर्वाचनसहित विभिन्न चरण पूरा गरेर रास्वपाले आज उम्मेदवारको रुपमा डा लेखजंग थापाको  नाम घोषणा गरेको हो।

यहाँ रास्वपाबाट उम्मेदवार हुन इच्छुक ९ जनाले निवेदन दिएका थिए। रास्वपाले ७ साउन २१ गतेसम्म आवदेन माग गरेको थियो। यस अवधिभित्र ९ जनाको आवेदन परेको थियो।

उपनिर्वाचनका लागि सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, जितबहादुर गुप्ता, कुसुम महर्जन, रचना क्षेत्री, पुनम कुमारी अग्रवाल र मधुप्रसाद अर्यालले आवेदन दिएका थिए।

उम्मेदवार हुन इच्छुकसँग रास्वपाले २५ हजार रुपैयाँ शुल्क पनि लिएको थियो।

रास्वपाले पार्टी सहमहामन्त्री विपीन आचार्यको संयोजकत्वमा उम्मेदवार छनोट समिति तयार पारेको थियो।

प्राइमरी इलेक्सनमा निर्वाचित भएर उम्मेदवार बनेका थापा रुपन्देहीकै सिद्धार्थनगर-९ स्थित अञ्चलपुरका हुन्। उनी वरिष्ठ न्युरोलोजिस्ट हुन्। चिकित्सक र समाजिक सेवामा उनले १७ वर्ष बिताएका छन्।

पोखराको मणिपाल कलेज अफ मेडिकल साइन्सेजबाट एमबीबीएस, बीपी कोइराला स्वास्थ्य विज्ञान प्रतिष्ठानबाट इन्टरनल मेडिसिनमा एमडी र कलेज अफ मेडिकल साइन्सेज चितवनबाट डीएम न्युरोलोजी अध्ययन गरेका थापा अमेरिकाको हार्वर्ड विश्वविद्यालयमा ‘सेफ्टी क्वालिटी लिडरसिप एण्ड इन्फमेटिभ’ अध्ययन गरेका छन्।

थापा नेपाल स्ट्रोक एसोसिएसनका संस्थापक अध्यक्षसमेत हुन्। उनकै टिमको पहलमा राष्ट्रिय स्ट्रोक उपचार व्यवस्थापन प्रोटोकल समेत जारी गरेको थियो। उक्त प्रोटोकललाई स्वास्थ्य तथा जनसंख्या मन्त्रालयले स्वीकृत गरेर कार्यान्वयनमा लगेको छ।

पछिल्लो समय भने उनी देशको विकास, सामाजिक न्याय र समृद्धिको प्रमुख माध्यम राजनीतिभन्दै रास्वपामार्फत राजनीतिमा लागेका थिए।