खोज

बुटवल, १५  भदौ ।

नेपाल कम्युनिष्ट पार्टी (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले रुपन्देहीमा माओवादी केन्द्र एक्लै चुनाव लड्ने र उत्कृष्ट नतिजा निकाल्ने दाबी गरेका छन । प्रचण्डले भने – “ कमरेडहरु, रुपन्देहीमा हामी अघिल्ला भन्दा अझ राम्रो नतिजा ल्याउँछौं । एक्लै चुनाव लड्ने हो, त्यसको लागी तयारी सुरु गर्नुहोस् ।”

पछिल्लो समय पार्टीभित्र देखिएका असन्तुष्टि, बहस र मतभिन्नतालाई प्रचण्डले वर्गसंर्घषको स्वाभाविक स्वरुपका रूपमा व्याख्या गरेका थिए । प्रचण्डले पार्टिको निति र बिधि विपरित नजान समेत आग्रह गरे उनले विश्वकै क्रान्तिकारी आन्दोलनहरूमा यस्ता बहस हुने गरेको उल्लेख गर्दै माओवादी केन्द्रभित्र देखिएको बहसलाई सकारात्मक रूपमा लिन सबै नेता कार्यकर्तालाई आग्रह गरे ।

उनले माओत्से तुङ, ल्यू साओची र लिन प्याओबीचको ऐतिहासिक सम्बन्धलाई उदाहरण दिँदै नेतृत्वमा विश्वास, आस्था र विश्वासघात दुवै देखिने कुरा स्पष्ट पारे ।

प्रचण्डले जनयुद्ध, शान्ति प्रक्रिया र गणतन्त्र स्थापनामा माओवादी केन्द्रले निर्वाह गरेको भूमिकालाई इतिहासले उच्च स्थान दिएको बताए । परिवर्तनका आन्दोलनलाई व्यवस्थित रूपमा अभिलेख गर्ने आवश्यकतामाथि जोड दिँदै उनले पार्टीले यसका लागि अभियान सञ्चालन गर्ने घोषणा गरे ।

उनले भने – “देशभरका वडाबाट जनयुद्ध र जनआन्दोलनमा सहभागी सहिद, घाइते, अपांगता बोकेका, जेलनेल भोगेका सबैको विवरण संकलन गरेर केन्द्रमा पठाउनुपर्छ । जुनसुकै पार्टीका भए पनि गणतन्त्रमा योगदान गर्ने नागरिकलाई सम्मान गर्ने मापदण्ड बनाइन्छ ।”

प्रचण्डले हाल माओवादी केन्द्रप्रति जनताको विश्वास पुनः बढ्दै गएको दाबी गरे । उनले यसबाट डराएर “प्रतिक्रियावादी र बिचौलिया” समूहहरु माओवादी आन्दोलनविरुद्ध लागिपरेको आरोप समेत लगाए । तर विज्ञान र वर्गसंर्घषको नियमअनुसार माओवादी आन्दोलन अझै अगाडि बढ्ने विश्वास पनि व्यक्त गरे ।

बैठकमा अध्यक्ष प्रचण्डले पार्टी आन्दोलनको समीक्षा गर्दै संगठन पुनर्गठन, नेतृत्व हस्तान्तरणको तयारी, जनताको भरोसाप्रति जिम्मेवारी र भविष्यको रणनीतिबारे धारणा राख्दै समाजबादि क्रान्तिको नेत्तृत्व माओवादि केन्द्रवाट मात्रै संम्भव भएको दाबि गरे उनले परिवर्तनको जग माओवादीले राखेको भन्दै त्यसको रक्षा गर्ने क्षमता पनि माओवादीसँगै रहेको बताए ।

लुम्बिनी प्रदेशको सातौं पूर्ण बैठकले माओवादी केन्द्रलाई रुपन्देहीमा आगामी चुनावमा एक्लै उभिन तयार पार्ने संकेत दिएको लम्बिनी प्रदेशका अध्यक्ष सुदर्शन बरालले बताए। अध्यक्ष प्रचण्डको सम्बोधनले पार्टीभित्रको बहसलाई आत्मसात गर्दै संगठनात्मक संरचना पुनर्गठन, ऐतिहासिक योगदानको अभिलेखीकरण र भविष्यका चुनौती सामना गर्ने दिशामा पार्टी केन्द्रित हुने सन्देश दिएको बरालले बताए  ।