खोज

बुटवल, १५ भदौ । 

नेपाली काँग्रेसको आन्तरिक राजनीतिमा नयाँ तरङ्ग ल्याउने अभिव्यक्ति दिँदै सहमहामन्त्री किशोर सिंह राठौरले आगामी १५ औँ महाधिवेशनमा आफू सहजै सभापति बन्ने दाबी गरेका छन् ।

रिपोर्टर्स क्लब नेपाल, लुम्बिनी प्रदेशले बुटवलमा आयोजना गरेको साक्षात्कार कार्यक्रममा बोल्दै राठौरले मुलुकमा बढ्दै गएको अराजकता, बेथिति र भ्रष्टाचार नियन्त्रण गर्न “सक्षम र योग्य नेतृत्व आफू मात्र हो” भन्दै दृढ घोषणा गरे ।

सभापति शेरबहादुर देउवाको साथ–सहयोग रहने विश्वास व्यक्त गर्दै उनले भने, “म प्रधानमन्त्री वा मन्त्री बन्ने रहरले होइन, काँग्रेसलाई बलियो बनाउन सभापति बन्न चाहन्छु ।

कमजोर काँग्रेसले लोकतन्त्र कमजोर बनाउँछ र नागरिकका अधिकार खोसिन्छन् ।” प्रतिनिधि सभा सदस्य समेत रहेका राठौरले पार्टी सभापति भएपछि सङ्गठनलाई नवीकरण गर्ने, भ्रष्टाचार नियन्त्रणमा कठोर कदम चाल्ने र नेतृत्वमा नयाँ धार ल्याउने प्रतिबद्धता दोहो¥याए ।

सत्ता समीकरणबारे प्रश्न उठाउँदै उनले काँग्रेस–एमाले सहकार्यलाई व्यवहारमै इमानदारीपूर्वक पालना गर्नुपर्ने चेतावनी दिए । एमालेको प्रतिबद्धताप्रति आंशिक अविश्वास प्रकट गर्दै उनले भने, “इमानदारीपूर्वक सहकार्य भयो भने मात्र गठबन्धन टिक्छ, नत्र काँग्रेस आफैँ बलियो भएर अगाडि बढ्नुपर्छ ।”

राजनीतिक वृत्तमा उनको यस्तो अभिव्यक्ति काङ्ग्रेसभित्रै नेतृत्व प्रतिस्पर्धाको आगो चर्किँदै गएको सङ्केतका रूपमा लिइएको छ । राठौरले खुलेआम सभापति बन्ने आकाङ्क्षा प्रकटसँगै महाधिवेशन असाधारण प्रतिस्पर्धी हुने निश्चित भएको विश्लेषण गर्न थालिएको छ ।