खोज

बुटवल, १४ भदौ ।

प्रधानमन्त्री केपी शर्मा ओलीको चिनियाँ राष्ट्रपति सी चिनफिङसँग आजै भेटवार्ता हुने भएको छ। आजै चीनको तियान्जिन प्रस्थान गरेका प्रधानमन्त्री ओलीको आज साँझपख राष्ट्रपति सीसँग करिव २० मिनेट भेटवार्ता हुने भएको हो।

तियान्जिन गेष्ट हाउसमा हुने भेटवार्तामा राष्ट्रपति सीले ५ः३० देखि ५ः५० सम्म समय उपलब्ध गराएको परराष्ट्र स्रोतहरूले जानकारी दिएका छन्। सो भेटवार्ता तियान्जिन गेष्ट हाउसमा हुनेछ।

सांघाई सहयोग संगठन एससीओ) को शिखर सम्मेलनका लागि प्रधानमन्त्री ओली आज अपराह्न  ३ बजे तियान्जिनस्थित विनहाई अन्तर्राष्ट्रिय विमानस्थल पुग्नेछन्। ओलीलाई तियान्जिनका उपमेयर र चीनका लागि नेपाली राजदूत डा कृष्णप्रसाद ओलीलगायतले स्वागत गर्नेछन्।

तियान्जिनमा प्रधानमन्त्री ओलीको बसोबासको प्रबन्ध विमानस्थलबाट करिब आधा घण्टा पर रहेको नदी किनारास्थित होलिडे इन होटलमा गरिएको छ। होटलमा पुगेर केहीबेर आराम गरेपछि ओली राष्ट्रपति सीसँग भेटवार्ताका लागि तियान्जिन गेष्ट हाउसतर्फ लाग्नेछन्।

‘चिनियाँ पक्षले राष्ट्रपति सीसँग भेटवार्ताका लागि २० मिनेटको समय उपलब्ध गराएको छ’ परराष्ट्र मन्त्रालय स्रोतले भन्यो, ‘अपरान्ह ५ः३० देखि ५ः५० सम्मको अवधि तोकिएको छ। ओली तियान्जिन पुग्नुहुँदासम्म कारणवस समय परिवर्तन भएन भने उहाँले त्यसैअवधिमा राष्ट्रपति सीसँग भेटवार्ता गर्नुहुनेछ।’

राष्ट्रपति सीसँग प्रधानमन्त्री ओलीको भेटवार्ता प्रतिनिधिमण्डल स्तरमा हुनेछ। त्यसक्रममा प्रधानमन्त्री ओलीका साथ अन्य १२ जना नेपाली अधिकारीहरूले सहभागी हुनेछन्।

सी–ओली भेटवार्तामा सहभागी नेपाली प्रतिनिधिमण्डलका बरिष्ठ सदस्यहरूमध्ये ८ जना अगाडिको सिटमा रचार जना पछाडिको सिटमा रहनेछन्।

प्रधानमन्त्री ओलीका साथ अगाडिको सिटमा हुनेहरूमा पूर्व उपप्रधानमन्त्री तथा प्रतिनिधिसभा सदस्य रहेका कांग्रेस उपसभापति पूर्णबहादुर खड्का, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, प्रधानमन्त्रीमा आर्थिक तथा विकास सल्लाहकार डा. युवराज खतिवडा, एमाले नेता एवं सांसद छविलाल विश्वकर्मा, परराष्ट्र सचिव अमृतबहादुर राई, चीनका लागि नेपाली राजदूत कृष्णप्रसाद ओली र चीन मामिला हेर्ने परराष्ट्र मन्त्रालयको उत्तर-पूर्वी महाशाखा प्रमुख सहसचिव भृगु ढुङ्गाना छन्।

सीसँगको प्रधानमन्त्री ओलीको भेटवार्तामा पछिल्लो सीटमा रहने अधिकारीहरूमा प्रधानमन्त्री ओलीका प्रमुख निजी सचिव राजेश बज्राचार्य, बेइजिङस्थित नेपाली राजदूतावासकी उपनियोग प्रमुख रोशन खनाल, दूतावासकी कन्सुलर सविता नकर्मी र परराष्ट्र मन्त्रालयका उपसचिव मनहरि दंगाल छन्।

रुसी राष्ट्रपति भ्लादिमिर पुटिनसँग प्रधानमन्त्री ओलीको भेटवार्ता सोमबार (१६ भदौ) मा तियान्जिनमै हुनेछ। भेटवार्तास्थल तियान्जिन मेजियाङ कन्भेन्सन सेन्टर तय भएको छ।

जानकारी अनुसार सोबार साँझ ६ः४५ देखि ७ः१५ सम्म दुई शीर्ष नेताबीच भेटवार्ता हुनेछ। चिनियाँ राष्ट्रपति सी र रुसी राष्ट्रपति भ्लादिमिर पुटिनबाहेक प्रधानमन्त्री ओलीको तियान्जिनमा थप दुई मुलुक– कम्बोडियाका प्रधानमन्त्री र लाओसका राष्ट्राध्यक्षसँग पनि भेटवार्ता हुनेछ।

त्यसमध्ये सोमबार (१६ भदौ) बिहान ९ः३० देखि १०ः१५ सम्म लाओसका राष्ट्रपति थोङगुन सिसोलिथसँग तियान्जिन लेक होटलमा र कम्बाडियाका राष्ट्रपति हुन मानेटसँग तियान्जिन मेजियाङ कन्भेन्सन सेन्टरमा ११ः३५ देखि १२ः०५ बजेसम्म भेटवार्ता हुनेछ।

१५–१६ भदौमा तियान्जिनमा हुने एससीओ शिखर सम्मेलनमा नेपाली प्रतिनिधिमण्डलको नेतृत्व गर्दै सहभागिता जनाउने प्रधानमन्त्री ओली मंगलबार (१७ भदौ) मा तियान्जिनबाट बेइजिङ प्रस्थान गर्नेछन्। तियान्जिन-बेइजिङमा सञ्चालिन द्रुतगतिको रेल चढेर उनी चिनियाँ राजधानी पुग्न लागेका हुन्।

बेइजिङका लागि उनी तियान्जिनबाट मंगलबार विहान ११ बजे रेल चढ्नेछन् र ३५ मिनेटको रेलयात्रापछि बेइजिङस्थित साउथ रेलवे स्टेशनमा ओर्लनेछन्।